भांगरभूंय | प्रतिनिधी
भांगरभूंय । प्रतिनिधी
साखळीः एनसीयुआय को ऑपरेटीव्ही फिल्ड प्रोजेक्ट गोंय आनी गोंय राज्य को ऑपरेटीव्ही युनियन एलटीडी- पणजी आनी विविधा उच्च माध्यमीक विद्यालय, नावेली- साखळी हाच्या जोड पालवान को ऑपरेटीव्ही कनेक्ट कार्यशाळा विद्यालयाच्या सभाघऱांत जाली. मुखेल सोयरो म्हणून विद्यालयाचो वेवस्थापक आनी आदलो आमदार प्रताप गांवस हाजीर आशिल्लो. विद्यालयाचो प्राचार्य रमेश सिनारी, संयोजक एकनाथ मांद्रेकार, मंगेश फडते, हेमश्री गडेकार माचयेर आशिल्ली.
कार्यावळीची सुरवात विद्यालयाचो संस्थापक आनी आदलो आमदार सर्गेस्त गुरुदास गांवस हाच्या फोट्याक हाऱ घालून जाली. मानेस्तांची वळख रमेस सिनारीन करून दिली. दिवली पेटोनव कार्यशाळेचें उक्तावण केलें.
दोन सत्रांत ही कार्यशाळा जाली. सहकार अधिकारी रमेश फडतेन पयल्या सत्रांत सहकार संस्थेची निर्मणी आनी गोंयांत तयार जाल्ल्यो संस्था हाचेर भाश्य केलें. विद्यार्थ्यांनी विचारल्ल्या प्रस्नांक ताणे जाप दिली. हेमश्री गडेकारान बचत गटाचें म्हत्व सांगून बायलांची सर्वांगी उदरगत ह्या विशीं मत प्रदर्शन केलें. बायलांनी आपले कडेन आशिल्ल्या कलेच्या आदारान स्वताचो वेवसाय सुरू करून आत्मनिर्भर जावपाक जाय अशें तिणे सांगलें. सूत्रसंचालन किशोर शिरोडकारान केलें आनी एकनाथ मांद्रेकारान उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
