भांगरभूंय | प्रतिनिधी
भांगरभूंय । प्रतिनिधी
केरी-सत्तरी- शिरोली हांगच्या संत फटी म्हाराज मठांतल्यान पंढरपूर माघ वारीक गेल्ले 95 वारकरी पंढरपुरांत दाखल जाले. 5 फेब्रुवारीक ताणी पाय वारीक मठांतल्यान सुरवात केल्ली. चोर्ला घाट रस्त्या वयल्यान चलत 13 दिसांनी ते पंढरपुरांत पावले. चोर्ला, कालमणी, बिजगर्णी, काकती, चिकलगठी, जैनपूर, म्हैशाळ, विलवाडी, अहिल्यानगर, मेथवडी फाटो, खर्डी हांगा रातयां ते रावले. थंयच्या विठ्ठल भक्तांनी ताची रावपाची आनी जेवपाची वेवस्था केली.
पंढरपुरांत पावल्या उपरांत वारकऱ्यांनी वाळवंटी गजर, चंद्रभागा आरती करून विठ्ठल, रखुमाईचें दर्शन घेतले. माघ एकदशीक चंद्रभागेंत न्हावून विठ्ठलाचें मुख दर्शन घेव ते बशीन शिरोली परत आयले. फाटल्या तेरा वर्सां सावन शिरोली मठा वतीन ही वारी आयोजीत करतात. सकाळीं साडेपांचाक उठून न्हावंन आनी काकड आरत्यो करून वारकरी चलपाक सुरवात करतात, साडे धाच्या सुमाराक थारयल्ले सुवातेर थांबतात, जेवून दनपारां साडेतीन वरांचेर परत चलपाक सुरवात करतात. दनपारचें आनी रातचे जेवण वारकऱ्यांचो एक गट करता. वांगडा आशिल्ल्या वाहनांत शिधा आसता.
अदूंचे वारीत शिरोली हांगचो तीन वर्सां पिरायेचो शाश्वत सिद्धेश गांवस हाणे वांटो घेतिल्लो. वांगडा ताची आवय सुचिता आनी बापूय सिद्धेश आशिल्लो. संत फटी म्हाराज मठाचो मुखेली विठोबा गांवस हाचो तो नातू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
