भांगरभूंय | प्रतिनिधी
दिवचल, प्रतिनिधी : दिवचले‘छत्रपती शिवाजी महाराज संकुलांत’ पालिकेच्या परवानगेन सोर्याचीं दुकानां सुरू आसात. आयज शिवजयंतीचें निमीत्त करून सोर्याचीं दुकानां सुरू आशिल्ल्याचो निशेध करून भगवान हरमलकर हांणी छ. शिवाजी महाराज मैदानाचेर उपोशण सुरू केल्लें. मात हे सुवातेर आयज राज्य पांवड्यार शिवजयंती जावपाची आशिल्ल्यान दिवचल पुलिसांनी हरमलकार हांकां आंदोलन बंद करपाची सुचवणी केली. मात कांयच आयकनासतना आपल्या मतार ते ठाम रावले. ताका लागून पुलिसांनी ताका उखलून पुलीस स्टेशनार व्हेलें.
मजगतीं, दिवचल बाजारांत पालिकेन उबारिल्ल्या बाजार संकुलाक ‘छत्रपती शिवाजी महाराज’ हांचें नांव दिलां. ह्या संकुलांत एका वेवसायिकाक पालिकेन सोर्याचें दुकान सुरू करपाची परवानगी दिल्ली. हाचेर शिवमोगींनी आक्षेप घेवन निवेदन दिल्लें. हाची दखल घेवन पालिकेन संकुलांत अशा वेवसायांक परवानगी दिवची न्हय असो थाराव घेतिल्लो. हाका आदले नगरसेवक अजित बिर्जे हांणी दिवचल न्यायदंडाधिकार्यां सामकार आव्हान दिल्लें. थंय पालिके आड निकाल लागलो. ‘अशे तरेचो थाराव घेवपाचो अधिकार पालिकेक ना’, अशें सांगून न्यायदंडाधिकार्यान ती याचिका निकालांत काडिल्ली. ह्या निकाला उपरांत पालिकेन संकुलांत सोरो विक्रेक परवानगी दिल्ली. आतां थंय दुकानूय सुरू जालें.
भगवान हरमलकार आनी शिवप्रेमींनी ‘पालिकेन सोरो विकपाक परवानगी देवन छ. शिवाजी महाराजांचो अपमान केला. ताका लागून हांगा सोरो विकचो न्हय वा संकुलाचें नांव बदलचें.’ अशी मागणी थळाव्या आमदारां सयत प्रशासकीय यंत्रणांक निवेदना वरवीं केल्ली. तशेंच ही मागणी मान्य करूंक ना जाल्यार शिवजयंती दिसा आंदोलन करपाची शिटकावणीय तांणी दिल्ली.
मजगतीं, आयज सकाळच्या ८ वरांचेर हरमलकार हांणी छ. शिवाजी महाराज मैदानाचेर शिवरायांच्या पुतळ्या मुखार उपोशणाक सुरवात केली. ह्याच मैदानाचेर आयज सांजेवेळार राज्य पांवड्यार शिवजयंती मनयतले. हे कार्यावळीक मुख्यमंत्री डॉ. प्रमोद सावंत, पर्यटनमंत्री रोहन खंवटे, केंद्रीय मंत्री श्रीपाद नायक आनी हेर मानेस्त हजर रावतले. ताका लागून दिवचल पुलिसांनी ही सुवात हरमलकार हांकां सोडपाची सुचवणी केली. मात, हरमलकार थंयच्यान उठपाक तयार नासले. ताका लागून पुलिसांनी हरमलकार हांकां थंयच्यान उखलून गाडयेंत बसयलो आनी पुलीस स्टेशनांत व्हेलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
