भांगरभूंय | प्रतिनिधी
हांव सदांच वेगवेगळ्या करियरांच्या सोदांत आसता, तुमी पसून आसतले. आयज आमी जें करियर पळतले, ताका मागणी तर आसाच, पूण जायते जाण तें करियर करपाक इत्सुक आसतले. राज्यांत गुन्यांव जायत आसात. हाची सगली जापसालदारकी आमी पुलिसांच्या माथ्यार दितात. खरें म्हणल्यार आमी पसून तांकां मजत करपाक जाय. खाजगी गुप्तहेर ही संकल्पना व्हडल्या शारांनी आसता, कित्याक तर थंय गुन्यांव जावपाचे प्रमाण चड आसता आनी पुलीस उणे. गोंयांत पसून तशें जावपाक लागलां. खून, बलात्कार, हॅकिंग ह्यो गजाली सदच्योच जाल्यात. कांय दिसाळ्यांनी छापून येतात, बऱ्योच येनात आसतल्यो. हे गुन्यांवकार गोंयकार काय भायले, हातूंत आमी वचुया नाका, पूण हें उणें जावपाक आमी मजत करपाक शकतात. म्हणून ह्या अभ्यासक्रमाची म्हायती दिवची, अशें म्हाका दिसलें.
तुमी शेरलाॅक होम्स हाचे विशीं सिनेमांनी, टिव्हीचेर पळयलां आसतलें. देशा भितर पसून जायतीं हेरगिरीचीं प्रकरणां वाचल्यांत, पळल्यांत आसतलीं. ह्या कामाक खूब धाडस गरजेचें. तशेंच म्हायती लेगीत म्हत्वाची आसता. ती ह्या अभ्यासक्रमांत मेळपाक शकता. हो कोर्स पुण्यांतली एक संस्था, नॅशनलिस्ट डिटेक्टीव्ह फोर्स दिता. हातूंत गुन्यांव सोदपी खाजगी गुप्तहेर कशे जावं येता, पुलिसाच्या गुप्तचर विभागांत तुमी कशे वचूं शकतात, हांचें मार्गदर्शन मेळटा. www.ndfdetective .com ह्या संकेतस्थळाचेर हाची चड म्हायती मेळटली. 8007341905, 8007341570 ह्यो फोन क्रमांकाचेरुय संपर्क करूं शकतात. ईमेल पत्तो आसा- [email protected]
गुप्तचर जावपाक लागपी कुशळटाय, लिपयिल्लो कॅमेरो, ताचें साॅफ्टवॅर, फिल्डाचेर कशें वावरप, गुप्तचराचें काम कितें, ह्यो सगल्यो गजाली तुमकां अभ्यासक्रमांत शिकयतले. हो कोर्स करतच पुलीस जावपाची संद मेळूं शकता. खाजगी संस्था सुरू करूं येता. भारतीय गुप्तचर संस्थेंत काम मेळूं शकता. आयबी, राॅ, एनआयए, सीबीआय, एनसीबी, सीआयडी हीं नांवां तुमीं आयकल्यांत आसतलींच. हातूंत प्रत्यक्ष काम करपाची संद ह्या अभ्यासक्रमा उपरांत मेळूं येता. धावी पास जाल्ले, तशेंच साठ वर्सां सकयल्या उमेदवारांक हो अभ्यासक्रम शिकपाक मेळटा. साठ दिसांचो हो कोर्स. जाय जाल्यार रावपा, जेवपाची तजवीज संस्था करता. पुण्यां आनी महाराष्ट्रांतल्या हेर शारांनी तांचे विभाग आसात.
करियर करप्यांनी अशा वेगळ्या करियरा मदीं लक्ष घालपाक जाय. बरेच फावट आमी ताचे कडेन फाव तें लक्ष दिनात. फक्त पारंपरीक करियरां कडेन वळटात. एक म्हणल्यार आमकां कोण नव्या करियरां विशीं मार्गदर्शन करीनात, खेरीज राज्य सोडचें पडटलें हाचो थर्त भंय आमकां आसता. बदलते परिस्थितींत ही मानसिकताय बदलप गरजेचें. राष्ट्रीय दिसाळ्यांनी बँको, लश्कराच्या जायत्यो जायराती येतात, रोजगार समाचारांत येतात. ताका अर्ज करपाक जाय. हे खातीर उमळशीक, धाडस आसप गरजेचें.
बारावेच्या विद्यार्थ्यां खातीर
अंदुंच्यान गोंयची अभियांत्रिकी प्रवेशाक जावपी प्रवेश परिक्षा जावचीना, त्या बदला जेईई मेन हे परिक्षेचे गुण अभियांत्रिकी प्रवेशाक ग्राह्य धरतले. तेन्ना बारावेच्या विद्यार्थ्यांनी ते परिक्षेची तयारी करची. आतां मेरेन गोंय समान प्रवेश परिक्षा आसताली, ती ह्या वर्सा सावन बंद केल्या. ताचे बदला जेईई मेन वा नीट परिक्षेचे गुण मतींत घेतले, अशें कळटा. आतां जेईई मेन एप्रीलांत जातली. ते खातीर
नोंदणी सुरू जाल्या. वैजकी, दांत महाविद्यालयां, आयुर्वेदीक काॅलेज हे खातीर नीट परिक्षेचे गुण म्हत्वाचे. आर्किटेक्चरा खातीर
नीट दिवची पडटा. तुमच्या शाळांतले शिक्षक तुमकां मार्गदर्शन करतले, खेरीज ह्या संस्था, परिक्षा हांचीं संकेतथळां पळोवपाक विसरचें न्हय.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
