भांगरभूंय | प्रतिनिधी
थळाव्यांची 15 दिसांची मुजत; आंदोलनाची शिटकावणी
भांगरभूंय । प्रतिनिधी
फोंडें: केरये- खांडेपारा अंडर बायपास उबारपाचो वाद परतून तकली वयर काडपाची शक्यताय वाडल्या. रस्त्याचे सर्वीस रोड करतना सरकारी मुळाव्या विद्यालयांतले विद्यार्थी, मुखार आशिल्ले चर्चींत वचपी लोकांक तशेंच पाचमे गांवांत वचपी लोकांक धोको निर्माण जातलो. खूबश्या वर्सांची मागणी पुराय केली ना जाल्यार वाठारांत खर आंदोलन करपाची तयारी गांवच्या लोकांनी केल्या.
राष्ट्रीय म्हामार्गाचें चारपदरी करतना सुरवेक थळाव्या लोकांनी धोको वळखून अंडरपास उबारपाची मागणी केल्ली. पूण थळाव्या लोकांचे मागणेक बांदकाम खात्याच्या अभियंत्यांनी त्या वेळार दाद दिवंक नाशिल्ली. पूण सध्या वाठारांत सर्वीस रोड उबारपाचें काम सुरू जाले उपरांत थळाव्या लोकांक धोको निर्माण जाला. सर्वीस रोड तयार करतना चर्ची मुखा वयलो दुरीग मोडटले. तशेंच विद्यालयाच्या दुरगाक तेंकून सर्वीस रोड येतलो. ताका लागून थळाव्यांच्या मनांत आतांच धोक्याची घाट वाजपाक सुरवात जाल्या.
आयतारा सकाळीं बांदकाम खात्याचे सहाय्यक अभियंते आनंद वाघुर्मेंकार हांणी थळाव्या लोकांची भेट घेवन चर्चा केली. फुडल्या 15 दिसां भितर चर्ची लागसार अंडरपास उबारपाचें आस्वासन मेळ्ळें ना जाल्यार सर्वीस रोडाचें काम आडावपाची शिटकावणी दिल्या. ताका लागून बांदकाम खात्याच्या अभियंत्यांक थळाव्या लोकांचे मागणे कडेन गंभीरपणान विचार करपाचो वेळ आयला. थळाव्या लोकां कडेन चर्चा केले उपरांत बांदकाम खात्याचे सहाय्यक अभियंते आनंद वाघुर्मेंकार हांणी सांगलें, अंडरपास बांदपाची मागणे संबंदांत वरिश्ठ अधिकाऱ्यांक कळयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
