भांगरभूंय | प्रतिनिधी
खबरां संस्था
दुबयः मुंबय इंडियन्साचो दबदबो फकत आयपीएलांतूच ना तर हेर लीग सर्तींत लेगीत तो आसा. एमआय एमिरेट्स ह्या मुंबयच्या फ्रँचायजीन आयएल टी-20 सर्तींत चॅम्पियन थारली. तांची ही धावी ट्रॉफी आसा. मुंबयन दुबय कॅपिटल्साक 45 धांवड्यांनी हारोवन ही टॅॉफी जिखली. निकोलस पुरनान वादळी खेळी केली. ते खातीर ताका मॅन ऑफ दी मॅच व्हो पुरस्कार फावो जालो.
शेनवारा रातीं दुबयच्या मैदानार जाल्ले फायनलींत दुबय कॅपिटल्सान टॉस जिखून पयलीं बॉलींग करपाचो निर्णय घेतलो. एमआय एमिरेट्स पंगडान 20 ओव्हरींत 3 आवट 208 धांवड्यो केल्यो. मुंबय खातीर निकोलस पुरनान 27 बॉलांत 2 चौके 6 सक्यांनी 57 धांवड्यांची तुफानी खेळी केली. दुसरो खेळगडो आंद्रे फ्लेचरान 37 बॉलांत 3 चौके आनी 4 सक्यांनी 53 धांवड्यो करून दुबय कॅपिटल्यास जैता खातीर 209 धांवड्यांचें लक्ष्य दिलें.
दुबयच्या डावाची सुरवात डळमळीत जाली. शू्न्य स्कोराचेर तांची पयली विकेट पडली. तांच्या बॅट्समनांक चड वेळ तग धरप जालें ना. सॅम बिलिंगान 29 बॉलांत सगल्यांत चड 40 धांवड्यो केल्यो. ताणे 3 चौके आनी 2 सके हुबयले. दुबय पंगडान 20 ओव्हरींत 7 आवट 167 धांवड्यो केल्यो. मुंबय खातीर विजयकांत आनी ट्रॅट बोल्टान बरी बॉलींग करून दरेकी दोन विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
