भांगरभूंय | प्रतिनिधी
खबरां संस्था
सेलंगोरः भारताच्या बायल बॅडमिंटन पंगडान आयतारा मलेशियांतल्या सेलंगोर हांका जाल्ले फायनलींत थायलंडाक 3-2 अश्या गेमींनी हारोवन बॅडमिंटन आशिया टीम चॅम्पिशनशीप सर्तीचें वस्तादपण मेळोवन इतिहास रचलो. बॅडमिंटनच्या इतिहासांत भारतान प्रतिश्ठेची आशिया टीम चॅम्पियनशीप जिखपाची ही पयलीच खेप आसा.
पीव्ही सिंधू, गायत्री गोपीचंद, तेरेसा जॉली आनी अनमोल खरब हांणी आपापल्या मॅची जिखून पंगडाक व्हडलें जैत मेळोवन दिलें.
बायल बॅडमिंटनान सर्वोच्च एकोडी रँकिंग आशिल्ल्या पीव्ही सिंधून काटेथोंगाचर सरळ गेमीनी जैत मेळोवन भारताक बरी सुरवात करून दिली. भारताची स्टार दोट्टी जोडी तेरेसा जॉली आनी गायत्री गोपीचंद हाणी दोट्टीच्या पयले मॅचींत जैत मेळोवन भारताक 2-0 अशी म्हत्वाची आघाडी मेळोवन दिली.मात भारताच्या अश्मिता चहिलान एकोडीची दुसरी मॅच आनी प्रिया कोन्जेंगबम आनी श्रृती मिश्रा हाणी दोट्टीतंली दुसरी मॅच वोगडायल्लान मेलेशियान 2-2 अशी बरोबरी केली. त्या उपरांत भारताच्या 17 वर्सा पिरायेच्या अनमोल काबान चोइकिवोंगलाक हारोवन भारताक वस्तादपण मेळोवन दिलें.
दुखापतींतल्यान पुनरागम करून आपली पयली सर्त खेळपी पीव्ही सिंधून फकत 37 मिनटांत सुपनिंदा काटेथोंगाक 21-12, 21-12 अशें हारोवन भारताक 1-0 अशी आघाडी मेळोवन दिली. गायत्री गोपीचंद आनी जॉली तरेसा हांणी जोंगफोलफाम कितिताराकुल आनी रविंदा प्रजोंगजल हांका तीन गेमीतचे मॅचींत हारोवन भारताक 2-0 अशे फुडे व्हेलें. गायत्री आनी जॉली जोडयेन निमणे गेमींत सुरवेक 6-11 अश्या गुणांनी फाटीं पडून लेगीत खेळाचेर वर्चस्व मेळोवन हे दोट्टी मॅचींत थायलंडच्या जोडयेक 21-16, 18-21, 21-16 अशें हारयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
