भांगरभूंय | प्रतिनिधी
खबरां संस्था
राजकोटः बॅझबॉल तंत्रान भारताक बुद्द शिकोवपाक आयिल्ल्या इंग्लंड पंगडाचेर तांच्याच तंत्रान तिसऱ्या टॅस्ट मॅचींत भारतान आयतारा 434 धांवड्यांनी दणदणीत जैत मेळयलें. भारताचें आतां मेरेनचें हें सगल्यांत व्हड जैत आसा. टॅस्ट मॅचींच्या इतिहासांत धांवड्यांच्या फरकान भारताचे हें सगल्यांत व्हडलें जैत आसा. हाचे पयलीं 2021 वर्सा मुंबयच्या वानखेडे स्टेडियमाचेर भारतान न्युझिलंडाक 372 धांवड्यांनी हारयल्लें. भारताच्या आयतारच्या जैतांत यशस्वी जयस्वाल आनी रवींद्र जडेजा हांणी मोलाचे योगदान दिलें. इंग्लंडाक भारतान जैता खातीर 557 धांवड्यांचें लक्ष्य दिल्लें मात ताचो दुसरो डाव 122 धांवड्यांत कोसळ्ळो.
मार्क वुड सोडल्यार इंग्लंडाच्या एकाय बॅट्समनाक 20 धांवड्यांच्या आंकड्या मेरेन वचन शक्य जालें ना. वुडान 6 चौके आनी एका सक्यान 15 बॉलांत 33 धांवड्यो केल्यो. भारता वतीन रवींद्र जडेजान 5 विकेटी घेतल्योय कुलदीपाक 2, बुमराह आनी आश्विनाक दरेकी एक विकेट मेळ्ळी. पांच टॅस्टीचे हे माळेंत भारतान आतां 2-1 अशी आघाडी घेतल्या. हैदराबादची पयली टॅस्ट इंग्लंडान जिखल्ली जाल्यार विशाखापट्टमांतली दुसरी टॅस्ट भारतान जिखल्ली.
हे मॅचींत भारतान टॉस जिखून पयलीं बॅटींग करून 445 धांवड्यो केल्ल्यो. ताका जाप दितना इंग्लंडाचो पयलो डाव 319 धांवड्यांत सोपलो. ताका लागून भारताक 126 धांवड्याची आघाडी मेळल्ली. त्या उपरांत भारतान 4 आवट 430 धांवड्यो करून आपलो दुसरो डाव सोडलो. ताका लागून वट्ट आघाडी 556 धांवड्याची जाली. ताका लागून इंग्लंडाक 557 धांवड्यांचे लक्ष्य मेळ्ळें. ताचो फाटलाव करतना इंग्लंडाचो दुसरो डाव 122 धांवड्यांत सोपलो आनी भारताक व्हड जैत मेळ्ळें. तिसरे टॅस्टींत दोनूय डावांत रवींद्र जडेजान अश्टतासी कामगिरी केली. ताणे पयल्या डावांत 122 धांवड्यांची खेळी केली. तशेच पयल्या डावांत 2 आनी दुसऱ्या डावांत 5 विकेटी घेतल्यो. हे कामगिरीक लागून ताका मॅन ऑफ दी मॅच पुरस्कार फावो जालो. हे टॅस्ट माळेंतली चवथी टॅस्ट 23 फेब्रवारीक रांची हांगा जातली.
जयस्वालाची विक्रमी कामगिरी
येशस्वी जयस्वालाचें बॅट लागलें म्हणटगीर ताका थांबोवप सोपें आसना ही गजाल तिसऱ्या टॅस्टींत पळोवपाक मेळ्ळी. भारताच्या दुसऱ्या डावांत ताणे धडाकेबाज खेळी करून विक्रमी दोट्टी शेंकडो केलो. ते करतना ताणे इंग्लंडाचो फास्ट बॉलर जेम्स अँडरसनाच्या एका ओव्हरींत तीन सके हुबयले. जयस्वालाचें टॅस्ट क्रिकेटींतलो व्हो दुसरो दोट्टी शेंकडो. तो करतना ताणे एकाफाटल्या एक टॅस्ट मॅचींत दोट्टी शेंकडो करपाचो विक्रम केलो. दुसऱ्या टॅस्टींत ताणे दोट्टी शेंकडो केल्लो आनी तिसरे टॅस्टींत 231 बॉलांत दोट्टी शेकडो केलो. शेनवारा ताणे शेंकडो केल्लो. मात स्नायू दुखपाक लागल्ल्यान ताका खेळ सोडून येवचें पडल्लें. आयतारा तो फीट जालो आनी आक्रमक खेळ करून ताणे दोट्टी शेंकडो केलो. तो करतना एका डावांत सगल्यांत चड 12 सके मारपाचो विक्रम आपल्या नांवार केलो. नवज्योत सिंग सिद्धू आनी मयांक अगलवाल हाच्या नांवार एका डावांत सगल्यात चड सके मारपाचो विक्रम आशिल्लो. तांणी 8 सके मारल्ले. जयस्वालान टॅस्ट क्रिकेटींत टी-20 स्टायल बॅटींग करुन दाखयली. ताच्या ह्या खेळाक लागून भारतात चवथ्या दिसा धांवड्यांचो दोगोंर उबारून इंग्लंडाचेर चेपण हाडपाक मेळ्ळें. दुसरे टॅस्टींत दोट्टी शेंकडो केल्या उपरांत तिसऱ्या टॅस्टींत इग्लंडा आड नाबाद दोट्टी शेंकडो करून जयस्वालान सौरव गांगुलीचो 17 वर्सांचो पाकिस्ताना आड केल्लो विक्रम मोडलो तशेंच पाकिस्तानाच्या वसीम अक्रमाच्या विक्रमा कडेन बरोबरी केली. ताणे आपल्या नाबाद खेळींत 12 सके आनी 14 चौके मारले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
