भांगरभूंय | प्रतिनिधी
पणजी, बातमीदार : हरमला जाल्ल्या अपघात प्रकरणांत नरेश गंठुला (24) आनी बंदी राजशेखर (24) ह्या करीमनगर- तेलंगणच्या पर्यटकांक पणजी पुलिसांनी काल रातीं उसरां अटक केली. ह्या दोगांय आड गुन्यांव दाखल केला. ह्या अपघातांत साहिल नायक आनी दीप नायक ह्या चुलत भावांक मरण आयिल्लें.
हरमला महापुरुष देवळा लागसारा शेनवारा सांजेवेळार सुमार 4 वरांचेर जाल्ल्या अपघातांत साहिल नायक आनी ताचो चुलत भाव दीप नायक ह्या दोगांयकूय मरण आयलें. हे दोगूय भाव आपले मोटारसायकलीन (जीए 11 एफ 1764) हरमलचे वटेन वताले. तेन्नाच एक पर्यटक स्विफ्ट कार (जीए 07 एफ 8139) रस्त्या कुशीक राविल्ली.
साहिल आनी दीप दोनचाकीन थंयच्यान वतना गाडयेंत बशिल्ल्या एकल्यान गाडयेचें फाटलें दार उक्तें केलें. त्या दाराक मोटारसायकलीन नेटाचो धपको दिलो. तेन्ना उसळून फुडल्यान येवपी ट्रकाच्या (जीए 02 यू 8828) टायरा पोंदाक साहिल आनी दीप सांपडले. गंभीर अवस्थेंत आशिल्ल्या साहिल हाका रोखडोच तुयें हॉस्पिटलांत, जाल्यार फाटल्यान बशिल्लो दीप हाका बांबोळेच्या गोमेकॉ इस्पितळांत उपचारा खातीर दाखल केले. मात हॉस्पिटलांत पावतांच साहिल हाका मरण आयिल्ल्याचें दोतोरांनी सांगलें. जाल्यार रातचें दीप हाकाय मरण आयलें.
अपघात घडतांच स्विफ्ट कारचालकान थंयच्यान पळ काडलो. थळाव्यांनी गाडयेचो नंबर नोंद करून पुलिसांक दिलो. ते प्रमाण पुलिसांनी गाडयेच्या चालकाक काल रातीं अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
