भांगरभूंय | प्रतिनिधी
नवी दिल्ली, खबरां संस्था: देशांत घोव-बायलेच्या नात्यांत वेर वचपाचीं प्रकरणां बरींच वाडल्यांत. देशभरांतल्या कुटुंबीक न्यायालयांनी 2021त कुटुंबीक वादाचीं 4,97,447 प्रकरणां आशिल्लीं. 2023 त तीं वाडून 8,25,502 वयर पावल्यांत. केंद्रीय कायदो आनी न्याय मंत्रालय तशेंच कुटूंब आनी भलायकी कल्याण मंत्रालयान सगळ्या उच्च न्यायालयांतल्यान 2021, 2022 आनी 2023 च्या कुटुंबीत वादांची म्हायती एकठांय केल्या.
कुटुंबीक वादांत घरांतलें झगडें, घटस्फोट, हुंडो मागणी, भुरग्यांचो ताबो आनी कुळारा गेल्ले बायलेक घरा हाडपा खातीर दाखल केल्ल्या खटल्यांचो आसपाव आसा. आंकड्या प्रमाण फाटल्या तीन वर्सांनी खटल्यांचो आंकडो 11 लाखां परस चड आसा. देशभरांतल्या कुटुंबीक न्यायालयांनी वर्सभर जितले खटले निकालांत हाडटात तितलेच नवे दाखल जाता. न्यायाधीशांचेर बरोच पेज आयला. वट्ट 812 कुटूंबीक न्यायालयांत 31 डिसेंबर 2023 मेरेन 11,43,915 खटले उरिल्ले. म्हळ्यार एका न्यायाधीशाचेर सुमार 1,408 खटल्यांचें वजें!
दिल्लींतल्या कुटुंबीक वाद प्रकरणा विशीं वकील मनीष भदौरिया सांगतात, जॉयन फॅमिली पद्धती सोंपोवप आनी एकूच कुटुंब पद्धतीक उर्बा दिवप हें एक घोव- बायलां मदल्या वादाचें कारण जावन आसा. आदीं जॉय्न फॅमिली खूब आशिल्लीं. घोव-बायलां मदीं वाद जाल्यार घरांतलो ज्येश्ठ तांकां समजावन तो वाद सोंपयतालो. आतां अशें जायना. आतां घोव-बायले मदीं वाद जाल्यार तांकां समजावपी घरा कोणूच नासतात. ताका लागून सुरवाते बारीक-सारीक आशिल्ल्यो गजाली फुडें वचून व्हडल्यो जातात. घरांतल्या ज्येश्ठांची भुमिका आतां न्यायालय आनी वकील करता. मात एकदां हांगा आयल्यार वाद सोंपपाची शक्यताय उणीच अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
