भांगरभूंय | प्रतिनिधी
उद्देगीक आस्थापनांक मेळटली स्वताची सौर उर्जा
पणजी: गोंयच्या उद्देगीक मळाक उर्जा स्वातंत्र्य वाडोवपाच्या हेतान गोंय राज्य उद्देग संघटणेन (जीएसआयए) एक आगळो उपक्रम चालू केला. राज्यांतल्या उद्देगीक आस्थापनांनी पांख्यांचेर (रुफटाॅप) सौर उर्जा पॅनल बसोवचे हे खातीर संघटणेन जागृताय मोहीम हातांत घेतल्या. ते खातीर राज्यांतल्या भोवतेक उद्देगीक आस्थापनांनी 20 मेगावॅट इतली सौर उर्जा तयार करपी प्रकल्प सुरू करपाचो हेत आसा.
कार्बन उणो करप, उर्जा कार्यक्षमताय वाडोवप आनी गोंयच्या उद्देगीक मळा भितर रिन्युवेबल उर्जा आपणावपाक चालना दिवपाचे नदरेन हो महत्वाकांक्षी यत्न म्हणल्यार म्हत्वाची प्रगती थारता. पांख्याचेर 20 मेगावॅट सौर क्षमता मेळोवपाचें तात्काळ ध्येय दवरून जीएसआयए ह्या वाठाराचे अर्थीक हितसंबंद मुखार व्हरपा वांगडाच मूर्त पर्यावरणीय फायदे हाडपाक बांदील आसा.
आपल्या वेगवेगळ्या वांगडी कार्यावळी आनी मिडिया वरवीं जीएसआयए ह्या उपक्रमाच्या प्रसारांत सकयल दिल्ल्या मुखेल मुद्द्यांचेर भर दिता
———-
सौर पॅनलाचे उणे दर : सद्याची बाजारांतली परिस्थिती उद्देगांक सौर उर्जेच्या मुळाव्या साधनसुविधांनी गुंतवणूक करपाची अपूर्व संद दिता, सौर पॅनलाचें दर उणें आसात. हाका लागून वेवसाय तिगून उर्जा स्रोतां कडेन वचपाक अनुकूल अर्थीक वातावरण आसा. परंपरीक उर्जा दरांतल्या उतार-चढावांची जोखीम सौर उर्जेक लागून उणी जाता.
ल्हान उद्देगांक अर्थीक प्रोत्साहन : रिन्यूएबल उर्जे कडेन वचपाक ल्हान उद्देगांक आदार दिवपाचें म्हत्व वळखून राज्य आनी केंद्र सरकारां एलटी जोडणी आशिल्ल्या आस्थापनांक प्रोत्साहन दितात. तें ल्हान उद्देगीक एककांमदीं सौर उर्जेचो व्यापक वापर करपाक प्रोत्साहन दिता. फुडें, वेगवेगळ्या बँकांनी दिवपी व्याज अनुदान येवजण्यो, चड भांडवल खर्चाक लागून येणावळीचेर परिणाम जावचो न्हय हाची खात्री करपाक मदत करतले.
खर्च उणो करपाची मागणी : जीएसआयएचो क्लस्टर पद्दत सौर उर्जा प्रणाली पुरवणदारांक अनुकूल दर थारावपाच्या अटींचेर वाटाघाटी करपाक मदत करता. हे पद्दतीन संभाव्यपणान 15% परस चड दर उणे करूं येतात, जाका लागून सौर उर्जा उद्देगीक भागधारकांक चड सुलभ आनी सवाय जाता.
यशस्वी आद्यरूप मॉडेल : पिळर्ण उद्देगीक वाठारांत 1 मेगावॅट सामुहीक प्रकल्प स्थापन करपा खातीर एक मॉडेल प्रकल्प यशस्वीपणान पुराय जाल्ल्यान जीएसआयएच्या उपक्रमाक बळगें मेळ्ळां. प्रस्तावीत पाखें सौर संयंत्रांची कार्यक्षमताय आनी मापन क्षमताय हाची ही एक गवाय म्हूण काम करता, गोंयांतल्या उद्देगीक मळाचेर व्यापक अंमलबजावणी खातीर वाट मेकळी करता.
रॅपीड पेबॅक काळ : सौर मुळाव्या साधनसुविधांचो खर्च उणो जाल्ल्यान आनी अनुकूल नियामक चौकटींक लागून उद्देगीक प्रकल्पांक रॅपिड पेबॅक काळाचो फायदो जातलो. कांय प्रकरणांनी पेबॅक काळ साडेतीन वर्सां मेरेन उणो आसता. हाका लागून दीर्घकाळ टिकावूपण आनी खर्चाची बचत करपा खातीर पाख्यांचेर आशिल्ल्या सौर पॅनलांत गुंतवणूक करपाची अर्थीक कार्यक्षमताय स्पश्ट जाता.
जीएसआयएचे अध्यक्ष श्री अनिरुद्ध धेंपो हांणी ह्या उपक्रमा विशीं सांगलें, ‘पाख्याचेर सौर प्लांटांची अंमलबजावणी गोंयांत टिकावू उद्देगीक पद्दतींक पोसवण दिवपाक आनी सकारात्मक पर्यावरणीय बदल घडोवन हाडपाक आमचें समर्पण दाखयता. सौर उर्जा आपणावप फकत पर्यावरणीय नदरेन टिकावू न्हय. तर अर्थीक नदरेनय अनुकूल. हें करचें न्हय, अशें ना. सहकाराच्या यत्नांतल्यान, जागृताय निर्माण करून, फुडल्या काळांत 20 मेगावॅट नव्या सौर क्षमतायचें आमचें ध्येय साध्य करपाचेर आमी विस्वास दवरतात.’
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
