भांगरभूंय | प्रतिनिधी
पणजी: बांबोळेच्या गोंय वैजकी म्हाविद्यालया भायर (गोमॅको) आशिल्ले गाडेकार पिवपाक बुरशें उदक वापरतात म्हणून गोमेकाँतल्या कर्मचार्यांनी गाडे तशेंच हॉटेलांतलें उदक पिवचें न्हय. तशेंच थंय तयार केल्लें खाण खावचें न्हय अशी नोटीस नोडल अधिकारी डॉ. उदय काकोडकार हांणी जारी केल्ली. मात विरोधी पक्षान खर टिका केल्ल्यान ती उपरांत फाटीं घेतली.
गोमॅकोच्या वाठारांत ज्या गाडे आनी हॉटेल धनयांक वेवसाया खातीर परवाने दिल्यात ते गाडेकार आपले गाडे आनी हॉटेलां खातीर जें उदक वापरतात तें उदक पिवपा खातीर योग्य ना. गोमॅकोंत जें उदक गार्डना खातीर वापरतात तें उदक ते खाण तयार करपाक आनी पिवपा खातीर वापरतात. ह्या उदकाचेर योग्य तरेन प्रक्रिया जायनाशिल्ल्यान तें पिवपा खातीर वापरुंक जायना. ताका लागून गोमॅकोंतल्या सगळ्या विभाग मुखेल्यांनी हाची दखल घेवची आनी आपल्या विभागांतल्या कर्मचार्यांक भायर आशिल्ले गाडे तशेंच हॉटेलांचें उदक वा थंयचे कांयच खावचें न्हय अश्यो सुचवण्यो दिवच्यो, अशी नोटीस डॉ. काकोडकार हांणी जारी केल्ली. पूण टिका सुरू केले उपरांत गोमॅकोन ही नोटीस रोखडीच फाटीं घेतली.
—————-
नोटीस गोमॅको खातीरूच आशिल्ली: डॉ. काकोडकार
डॉ. काकोडकार हांणी गोमॅको भायर गाडे तशेंच हॉटेलां विशीं आपणें जारी केल्ली नोटीस गोमॅको खातीरूच आशिल्ली. गोमॅकोच्या कर्मचार्यांनी सादूर रावचें, ह्या हेतान ही नोटीस काडिल्ली. हे नोटीसीचो हेर सामान्य जनते कडेन कसलोच संबंद नाशिल्लो अशें तांणी ‘भांगरभूंय’च्या प्रतिनिधी कडेन उलयतना सांगलें.
सरकार लोकांच्या जिवा कडेन खेळटा : पाटकार
गोमॅकोंतले घाणयारें उदक गाडेकार, हॉटेलकार वापरतात, अशें नोडल अधिकार्यांनी नोटीसे वरवीं जाहीर केलां. हाचे वयल्यान राज्य सरकार गोंयचे जनतेच्या आनी गोमॅकोंत उपचारा खातीर वचपी दुयेतींच्या कुटुंबियांच्या जिवा कडेन खेळटा अशें स्पश्ट दिसता, अशी टिका कॉंग्रेस प्रदेशाध्यक्ष अमीत पाटकार हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
