पुराभिलेख खात्यांत पुर्तुगेज अणकार करप्यांचो

भांगरभूंय | प्रतिनिधी

-कोंकणी साहित्य अनुवादकांनी हो वावर करचोः मंत्री सुभाष फळदेसाय

पणजीः पुराभिलेख खात्यांत इतिहासीक दस्तावेजांचीं हजारांनी कागदपत्रां आसात. हे दस्तावेज विंगड विंगड लिपयेंतल्यान तशेंच देशी आनी पुर्तुगेज भासांनी आसात. हातूंत गोंयचो इतिहास आनी संस्कृतायेक पोशक अशे जायते संदर्भ मेळटात. भाशेचो अभ्यास करतल्यांक हांचो व्हड आदार जांव येता ते खातीर खात्याक जाणकार अनुवाद करतल्यांची खूप गरज आसा. पुराभिलेख खात्यान पुर्तुगेज अणकार करप्यांचो पॅनल करून ऑनलायन सेवा दिवपाक सुरूवात केल्या, जाचो फायदो लोकांक जाता. कोंकणींत हे दस्तावेज अणकारीत करून कोंकणी साहित्य गिरेस्त करपाचोय वावर करपाक जाय अश्या अनुवादकांनी हो वावर करचो अशें मत पुराभिलेख खात्याचे मंत्री सुभाष फळदेसाय हांणी व्यक्त केलें.

ते खांडोळेंच्या सरकारी कला, विज्ञान आनी वाणिज्य महाविद्यालयांत कोंकणी विभाग आनी पुराभिलेख संचालनालयाच्या जोड पालवान आयोजीत केल्ल्या ‘पुर्विल्लें कोंकणीं साहित्य: संशोधनाच्यो नव्यो दिशा’ ह्या राज्य पांवड्यार आयोजीत केल्ल्या परिसंवादांत मुखेल सोयरे म्हण उलयताले.

सरकारी महाविद्यालय खांडोळें कोंकणी विभाग आनी पुराभिलेख संचालनालय गोंय सरकार हांच्या जोड पालवान बुधवार ता. 14 फेब्रुवारी 2024 ह्या दिसा ‘पुर्विल्लें कोंकणी साहित्य आनी संशोधनाच्यो नव्यो दिशा’ ह्या विशयाचेर एका दिसाचो राज्य पांवड्या वयलो परिसंवाद सकाळीं 9 ते सांजेचीं 5 वरां मजगती जालो. पुराभिलेख खात्याचे मंत्री मानादीक सुभाष फळदेसाय ह्या वेळार मुखेल सोयरे म्हण हाजीर आशिल्ले. पुराभिलेख संचालनालयाचे संचालक रोहीत कदम मानाचे सोयरे म्हण उपस्थीत आशिल्ले. विद्या प्रबोधिनी महाविद्यालयाचे प्राचार्य प्रो. डॉ. भूषण भावे हांणी बीज भाशण केलें. ह्या वेळार महाविद्यालयाच्यो प्रभारी प्राचार्या प्रो. डॉ. पुर्णकला सामंत हांणी येवकाराचें उलोवप केलें. कोंकणी विभागाचे मुखेली प्रो. डॉ. प्रकाश वजरीकार हांणी प्रास्तावीक केलें.

ह्या वेळार आपल्या भाशणांत पुराभिलेख मंत्री मानादीक सुभाष फळदेसाय हांणी पुराभिलेख खात्यांत इतिहासीक दस्तावेजांचीं हजारांनी कागदपत्रां आसात. हे दस्तावेज विंगड विंगड लिपयेंतल्यान तशेंच देशी आनी पुर्तुगेज भासांनी आसात. हातूंत गोंयचो इतिहास आनी संस्कृतायेक पोशक अशे जायते संदर्भ मेळटात. भाषेचो अभ्यास करतल्यांक हांचो खूप आदार जांव येता ते खातीर खात्याक जाणकार अनुवाद करतल्यांची खूप गरज आसा. पुराभिलेख खात्यान पुर्तुगेज अनुवाद करप्यांचो पॅनल करून ऑनलायन सेवा दिवपाक सुरूवात केल्या जाचो फायदो लोकांक जाता. कोंकणींत हे दस्तावेज अणकारीत करून कोंकणीं साहित्य गिरेस्त करपाचोय वावर करपाक जाय अश्या अनुवादकांनी करपाक जाय अशें तांणी सांगलें.

परिसंवादाच्या दुसऱ्या सत्रांत ‘पुर्विल्लें कोंकणी भाशीक दायज’ ह्या विशयाचेर प्रा. प्रियांका परब, प्रा. अंजू साखरदांडे, श्री. आकाश गांवकार हांणी आपले प्रपत्र सादर केले. ह्या सत्राचें अध्यक्षपद मराठी अध्ययन शाखा, गोंय विद्यापीठ हांगाच्यो डॉ. सुनिता उम्रसकर हांणी भुशयलें.

ह्या सत्रांत कोंकणी भाशा आनी समाजाच्या इतिहासाचेर भर दितना संशोधन जावपाची गरज आसा अशें मत डॉ. सुनिता उम्रसकर हांणी मांडलें. तिसऱ्या सत्रांत ‘पुविल्लें कोंकणी साहित्य संशाधनाच्यो नवो दिशा’ ह्या विशयाचेर डॉ. फा. लुईश गोमीश, फा.रोमन रोड्रीगीस, डॉ. बालाजी शणै हांणी आपले प्रपत्र सादर केलें. ह्या सत्राक अध्यक्ष म्हण शणै गोंयबाब भाशा आनी साहित्य महाशाला, गोंय विद्यापीठाचे संशोधनाचे उप अधिश्ठाता आनी सहयोगी प्राध्यापक डॉ. प्रकाश पर्येंकार आशिल्ले.

ह्या सत्रांक कोंकणी भाशेच्या पुराव्यांचेर आनी मिशनरी पाद्रींनी तयार केल्ल्या साहित्याचेर चर्चा जाली. चवथ्या सत्रांत ‘कोंकणी संशोधनाची साधनां आनी प्रक्रिया’ ह्या विशयाचेर डॉ. रेश्मा खोलकार आनी प्रा. किरण पालकार हांणी जोड प्रपत्र जाल्यार डॉ. पलीया पंडीत आनी प्रा. सुशांत नायक हांणी स्वतंत्र प्रपत्र सादर केलें. ह्या सत्राच्या अध्यक्षपदार शणै गोंयबाब भाशा आनी साहित्य महाशाळा, गोंय विद्यापीठ कोंकणी अध्यन शाखेचे संचालक प्रा. डॉ. हनुमंत चोपडेकार हांणी अध्यक्षपद भुशयलें. समारोप सुवाळ्याक ‘वर्सल’ कथा संग्रहा खातीर साहित्य अकादेमीचो 2023 चो पुरस्कार फावो जाल्ले लेखक भौ. डॉ. प्रकाश पर्येंकार हांचो महाविद्यालया वतीन प्रो. पुर्णकला सामंत हांणी भोवमान केलो.

हे कार्यावळीक गोंयांतल्या वेगवेगळ्या महाविद्यालयांतल्यांत तशेंत उच्च माध्यमीक विद्यालयांतल्यांत शिक्षक आनी विद्यार्थी हाजीर आसले. तशेंच लोकवेद संशोधक भौ. डॉ. पांडुरंग फळदेसाय आनी भौ. झिलू गांवकार खासा ह्या परिसंवादाक उपस्थीत आसले. कार्यावळीक महाविद्यालयाची IQAD संचालक आनी उप प्राचार्य डॉ. डिलेक्टा डिकोस्टा हांणी उपकाराचें उलोवप केलें. डॉ. रेश्मा खोलकार आनी प्रा. किरण पालकार हांणी परिसंवादाचें सुत्रसंचालन आनी सत्रांचे संयोजन केलें.