अभिनेत्री सुहानी भटनागर हिका १९ वर्सां पिरायेचेर मरण
भांगरभूंय | प्रतिनिधी
फरिदाबाद, खबरां संस्था: आमिर खानच्या ‘दंगल’ चित्रपटांत धाकट्या बबिता फोगाटाची भुमिका करपी अभिनेत्री सुहानी भटनागर हिका १९ वर्सां पिरायेचेर मरण आयलें. ल्हान पिरायेचेर मरण आयिल्ल्यान तिच्या कुटुंबाक धपको बसला. ‘दंगल’ चित्रपटा उपरांत ती व्हडल्या पड्ड्या पसन पयसूच राविल्ली. तशेंच सोशल मिडियाचेरूय ती सक्रीय नाशिल्ली.
सुहानीचो कांय दिसां पयलीं पांय फ्रॅक्चर जाल्लो. उपचारा मजगतीं चालू आशिल्ल्या वखदांचो तिचे कुडीचेर वायट परिणाम जालो. अहवाला प्रमाण तिच्या आंगांत हेर द्रव्यां जमा जावन तिका मरण आयलें.
फाटल्या कांय दिसां सावन सुहानीचेर फरीदाबादाच्या एम्स हॉस्पिटलांत उपचार सुरू आशिल्ले. उपचारा मजगतीं शुक्रारा (१६ फेब्रुवारी) रातचें तिका मरण आयलें. शेनवारा फरीदाबाद हांगा तिचे कुडीचेर निमणे संस्कार जाले.
सुहानी इन्स्टाग्रामार सक्रीय नाशिल्ली. तिची निमाणी इंस्टाग्राम पोस्ट नोव्हेंबर २०२१ ची आसा. ‘दंगल’ उपरांत अभिनेत्रीन चित्रपट मळा वयल्यान ब्रेक घेतिल्लो. अभ्यासाचेर लक्ष दिवपा खातीर तिचें चित्रपटाच्यो आयिल्ल्यो ऑफरी स्विकारूंक नाशिल्ल्यो. शिक्षण पुराय जाले उपरांत चित्रपट मळार देंवतलें अशें तिणें जायत्या मुलाखतींनीं सांगिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
