भांगरभूंय | प्रतिनिधी
नवी दिल्ली, खबरां संस्था: मनशांची तस्करी करपी टोळी बांगलादेशाच्यो चलयो विकत घेतात- विकतात. राष्ट्रीय तपास संस्थेक (एनआयए) टोळयेच्या २ वांगड्यांचे चवकशी मजगतीं ही म्हायती मेळ्ळ्या. ह्या लोकांनी ५० परस चड चलयांक भारतांतल्या विंगड विंगड राज्यांनी विकल्यांत. एनआयएक ३ वर्सांनी ६ राज्यांत विकिल्ल्या चलयांची म्हायती मेळ्ळ्या.
मनशांची तस्करी करपी टोळयेचे चवकशे वेळार एनआयएन म्यानमाराक रावपी रबी इस्लाम, मोहंमद उस्मान आनी शफी आलम हांकां अटक केल्ली. हे तिगूय भारतात विवीध राज्यांतल्या मनशांची तस्करी करपी टोळयांचे वांगडी आशिल्ले. त्या तिगांयनी सांगलें, ३ वर्सां खुबश्या चलयांक मोगाच्या जाळ्यांत आडकावन बांगलादेशांतल्यान भारतांत हाडले. उपरांत तांका हरियाणा, राजस्थान, यूपी, तेलंगण, बिहार, जम्मू-काश्मीरांत २ ते ५ लाख रुपयांक विकलीं.
बांगलादेशांत चलयांक फटोवप्यांक ५० हजार रुपया
तपास पंगडान तीन तस्करां कडल्यान एक डायरीय जप्त केल्ल्याची म्हायती सुत्रांनी दिली. तातूंत विकिल्ल्या चलयांचीं नांवां आनी मोबायल क्रमांक आसात. एनआयए ह्या सगळ्या चलयांक सोदतात. बांगलादेशांत चलयांक आडकावन मनशाची तस्करी करप्यांचे सुवादीन करप्यांक एके चलये फाटल्यान ५ हजार रुपया दितात. उपरांत ही टोळी तांकां शीम पार करून विवीध रस्त्यांनी भारतांत हाडटात.
तस्करीचे ३ मार्ग: बांगलादेश ते म्यानमार, थांयच्यान भुतान आनी नेपाळांतल्यान भारतांत
मार्ग १ : बांगलादेशांतल्यान मनशाची तस्करी करपी टोळी पयलीं चलयांक फटोवन म्यानमाराक व्हरतात. थंयच्यान भुतानाक, उपरांत तांकां नेपाळाक व्हरतात. तांकां नेपाळच्यान उत्तर प्रदेश वा बिहारांतल्या भारतांत हाडटात.
मार्ग २ : बांगलादेशांतल्यान म्यानमाराक हाडटात. उपरांत म्यानमारच्यान उदकांतल्यान प. बंगालाक हाडटात. हांगच्यान तांकां राज्यांतल्या विंगड विंगड राज्यांनी पावयतात. हो मार्ग सोपो आशिल्ल्या तस्करी करपी होच मार्ग सगळ्यांत चड वापरतात.
मार्ग ३: बांगलादेशांतल्यान पश्चीम बंगाल वा बिहारांत घुसोन चलयांक भारतांत हाडटात. हो मार्ग सामको सोंपो नाशिल्ल्यान तस्करी करपी चुकूनच हो मार्ग वापरतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
