भांगरभूंय | प्रतिनिधी
इंग्लंडान तिसरे टॅस्टींत आपल्या बॅझबॉलाची झलक दाखयत 445 धांवड्यो करपी भारताक घाम काडलो. दुसऱ्या दिसाचो खेळ सोंपलो त्या वेळार इंग्लंडान आपल्या पयल्या डावात 2 विकेटी वगडावन 207 धांवड्यो केल्ल्यो. विशेश म्हणल्यार ह्यो 204 धांवड्यो फकत 210 बॉलांनी आयल्यात. इंग्लंडाचो पंगड भारताचे धांवसंख्ये पसून अजून 238 धांवड्यांनी फाटीं आसा.
इंग्लंडाचो ओपनर बेन डकेटान आक्रमक शेंकडो मारलो. तो 133 धांवड्यो करून खेळपट्टीचेर आसा. ओली पोपान 39 धांवड्यांचें योगदान दिलें. जो रुट 9 धांवड्यो करून डकेटा वांगडा खेळपट्टीचेर आसा.
भारतान पयल्या डावांत 445 धांवड्यो केल्या उपरांत इंग्लंडान लेगीत आपल्या पयल्या डावाक आक्रमक सुरवात केली. ओपनर बेन डकेट आनी झॅक क्रावली हांणी पयले विकेटी खातीर 89 धांवड्यांची भागिदारी केली. हातूंत डकेटाचें व्हड योगदान आशिल्लें.
इंग्लंडान सुमार सचे धांवगतीन धांवड्यो करीत आपल्या डावाक सुरवात केल्ली. ते उपरांत आर आश्विनान क्रावलीक (8) बाद करून आपली 500वी विकेट घेतली. तशेंच इंग्लंडाक पयलो धपको दिलो. ते उपरांत ओली पोप आनी डकेट हाणें इंग्लंडाचो डाव मुखार व्हेलो.
दोगांयनी दुसरे विकेटी खातीर 93 धांवड्यांची भागिदारी केली. डकेटान 88 बॉलांनी 100 धांवड्यो केल्यो. मजगतीं, फास्ट बॉलर मोहम्मद सिराजान पोपाक बाद करून ही जोडी फोडली.
ते पयलीं भारताचो डाव 445चेर सोंपलो. रवींद्र जडेजान 112 धांवड्यो केल्यो. इंग्लंडा वतीन मार्क वुडान सगल्यांत चड चार विकेटी घेतल्यो. रेहान अहमदाक दोन विकेटी फावो जाल्यो. जेम्स अॅण्डरसन, टॉम हार्टले आनी जो रुट हाका दरेकी एक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
