भांगरभूंय | प्रतिनिधी
वास्को: वाहनांच्यो बॅटरी चोरी प्रकरणांत वेर्णे पुलिसांनी वेळसांवां रावपी तिगां तरणाट्यांक अटक केली. तांचे कडल्यान सुमार एक लाख रुपया मोलाच्यो बॅटऱ्यो जप्त केल्यात.
वेळसांवचे बस धनी मारियानो कार्वालो हांणी तांचे बशीची बॅटरी चोरिल्ल्या प्रकरणांत वेर्णे पलीस स्टेशनार कागाळ दाखल केल्ली. ही चोरी बारा तारखेक सांजवेळा सात ते तेरा तारखेक सकाळीं सात वरां मजगतीं कोणे तरी अनवळख्या मनशान केल्ल्याचें कागाळेंत म्हणिल्लें. ही बस तांणी आपले मालकीचे मेकळे सुवातेत उबी केल्ली.
ह्या बॅटरीचें मोल सुमार 10 हजार रुपया आशिल्ल्याचें कागाळींत म्हणलां. ते कागाळीची दखल घेवन वेर्णे पुलिसांनी तपासाक सुरवात केली. त्या वेळार वेळसांवां एका इमारतींत रावपी तिगां तरणाट्यांचो दुबाव आयिल्ल्यान तांचे कडेन चवकशी केली. त्या वेळार चोरी उक्तडार आयली. त्या तरणाट्यांनी आनीक कांय वाहनांतल्यो बॅटरी चोरिल्ल्याचें उक्तडार आयलें. ह्या प्रमरणांत राम नंदू राठोड (21) सागर नंदू राठोड (19), सचीन गुरुनाथ लमाणी (20) हांकां अटक केल्या.
हे तिगूय मूळ बागलकोट बिलगी कर्नाटकांतले आसात. ह्या चोरी प्रकरणांत पुलीस उपनिरिक्षक रामचंद्र नायक फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
