भांगरभूंय | प्रतिनिधी
भांगरभूंय । प्रतिनिधी
वाळपयः काल्याच्या वेळार गांवकार आनी गुरव म्हाजनां मदीं उप्रासल्ल्या वादाक लागून वेळूसच्या रवळनाथ देवळाच्या दाराक वाळपयचो मामलेदार दशरथ गांवस हाणे बिरेस्तारा कुलूप लायिल्लें. शुक्राराक तें काडून दार उगडलें. देवस्थानाचे सदचे धर्मीक विधी पयलीं भशेन सुरू आसतले अशें ताणे सांगलां. लोकांनी गैरसमज करून घेवचो न्ही अशें आवाहन ताणे केलां.
रवळनाथ देवाचो दोन दिसांचो कालो बुधवारा सुरू जाल्लो. तेन्ना गांवकार- गुरव वाद जाल्लो आनी दोग जाणांक मारपेट करपाचो प्रकार जाल्लो. मामलेदारान ह्या वेळार हस्तक्षेप करून देवळाच्या दाराक कुलूप लावपाक सांगल्लें. बिरेस्तारा काल्याचे विधी जावपाक शकले नात. देवळाच्या प्राकारांत पुलीस बंदोबस्त दवोरल्लो. शुक्राराक वातावरण निवळतगीर दाराचें कुलूप काडलें.
दाराक कुलूप लायलें तरी काल्या खातीर केल्ले फेरयेंत लोकांनी वचून वेगवेगळ्या वस्तूंची खरेदी केली. सध्या गांवांत तणावाची परिस्थिती ना. तरीय देवस्थान वाठारांत पुलिसांक दवोरलां अशें वाळपयचो निरीक्षक राहुल नायकान सांगलें. दोन गटांत वाद जाल्ल्यान खबरदारी म्हणून देवळाच्या दाराक कुलूप लावपाक सांगल्लें. तशें केलें ना जाल्यार देवळांतल्या धर्मीक कार्यावळींच्या अधिकारा वयल्यान संघर्श जावपाची शक्यताय आशिल्ली. ते खातीर कुलूप लावपाचो निर्णय घेवचो पडलो अशें मामलेदार दशरथ गांवस हाणे पत्रकारांक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
