भांगरभूंय | प्रतिनिधी
मडगांवचे नगरसेवक आमोणकार हांचो गंभीर आरोप
मडगांव, प्रतिनिधी : सध्या मडगांवां आधारकार्ड केंद्रांचेर बनावट दाखल्यांच्या आधाराचेर साडेतीन ते चार हजार रुपया घेवन नेपाळाच्या लोकांक आधारकार्ड करून दिवपाचीं प्रकरणां घडपाक लागल्यांत. हे विशीं नगरसेवक महेश आमोणकार हांणी खर पुलीस तपासणी करपाची मागणी केल्या.
मडगांव पालिकेचे फाटले वटेन आशिल्ले एके इमारतींत नियोजन आनी सांख्यिकी खातें आधारकार्ड सेवा दिवपाक नियुक्त केल्ल्यां कडल्यान बनावट कागदपत्रांच्या आधाराचेर नेपाळांतल्यान गोंयांत आयिल्ल्या लोकांक आधारकार्ड दिवप चालू आसा. पणजे रावपी नेपाळच्या नागरिकां कडल्यान साडेतीन ते चार हजार रुपया घेवन बनावट रेसिडेंट सर्टीफिकेट आनी हेर कागदपत्रां वरवीं गोंयांत आधारकार्ड करून दितात. हाचे खातीर राजू नांवाची एक व्यक्ती पणजेच्या तीस ते चाळीस नेपाळी नागरिकांक घेवन आयिल्लो. हे विशीं पुलीशेंत कागाळ केले उपरांत हें आधारकार्ड तयार करपाचें केंद्र हावसिंग बोर्ड वाठारांत स्थलांतरीत केलें.
नेपाळी लोकांक भारतीय दाखोवपा खातीर उत्तरप्रदेश वा हेर राज्यांतल्यान मेळिल्ल्या जल्मदाखल्यांचो वापर करतात. हें गोंयां खातीर तशेंच देशा खातीरूय घातकी आसा. ताका लागून आधारकार्ड तयार करपा खातीर परवानगी दिवपी एजन्सींची चवकशी जावची. तशेंच जे एजंट देशा भायल्या व्यक्तींक बनावट कागदपत्रां वरवीं आधारकार्ड तयार करुन दितात तांचेरूय कारवाय जावची, अशी मागणी नगरसेवक आमोणकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
