भांगरभूंय | प्रतिनिधी
भाजपा आनी येणावळ, आयकर खात्याचेर आरोप
नवी दिल्ली, खबरां संस्था : सर्वोच्च न्यायालयान इलेक्टोरल बाॅण्ड रद्द करपाचो आदेश दिवन एक दीस जाता थंयच आसा, देशांतल्या मुखेल विरोधी पक्षान, काँग्रेसीन सरकारान आपलीं बँक खातीं गोठयल्यात असो धक्को दिवपी दावो केला. हे संबंदी काँग्रेसीचे खजिनदार अजय माखन हांणी पत्रकार परिशद घेवन सत्ताधारी भाजपा, येणावळ आनी आयकर खात्याचेर गंभीर आरोप केले. आतां लायटीचें बिल भरपाक पसून आमचे कडेन पयशे नात, असो दावोय तांणी पत्रकार परिशदेंत केलो.
माखन म्हणटात…
अजय माखन हांणी बँक खातीं गोठयल्यांत असो आरोप करून ‘बँक आमी दिल्ले चेक क्लियर करीनात’ असो दावो केला. “सध्या आमचे कडेन खर्च करपाक पयशे नात. कर्मचाऱ्यांक पगार दिवपाक पयशे नात. सगळ्या गजालींचो परिणाम जाता. भारत न्याय यात्राच न्हय, तर काँग्रेस पक्षाचे पुराय राजकी प्रक्रियेचेर परिणाम जाला. आमकां लोकां कडल्यान पार्टी निधीच्या रुपांत पयशे मेळटाले आनी तातूंतल्यान आमी खर्च भागयताले. पूण आतां लोक विचारतले की आमी दिल्ले पयशे पक्षाक पावनात, जाल्यार आमी ते दिवप काय नात?’ अशें माखन हांणी म्हणलें.
लोकशाय गोठल्या
मजगतीं, माखन हांणी टिका केली की ‘ हीं फकत काँग्रेस पक्षाचीं खातीं गोठोवंक नात, तर आमच्या देशांतली लोकशायूय गोठल्या’. ‘लोकसभा वेंचणूक जाहीर जावपाक फकत दोन सप्तकां उरिल्लीं आसतना मुखेल विरोधी पक्षाचे खातें गोठोवन हें सरकार कितें सिद्ध करपाक सोदता? हीं खातीं खंयच्या आदाराचेर गोठयतात तें सांगल्यार हास्यास्पद दिसतलें. काल सांजवेळार युवा काँग्रेसीचें खातें गोठयलां. तातूंतल्यान आयकर खात्यान वट्ट 210 कोटी रुपयांची वसुली मागल्या’, अशें अजय माखन हांणी सांगलें.
“हें कांय बळिश्ट उद्देगपती वा कॉर्पोरेट कराचे पयशे न्हय. हे पयशे आमी ऑनलायन क्रावड फंडिंगांतल्यान एकठांय केल्यात. ह्या पयशांतले 95 टक्क्यां परस चड पयशे लोकांनी युपीआय वरवीं शंबर रुपया परस उण्या रुपांत जमा केल्यात. युवा काँग्रेसीचें वांगडीपण शुल्क म्हणून एकठांय केल्ले पयशे युवा काँग्रेसीच्या खात्यांत आसात. ते पयशे आयकर खात्यान गोठयल्यात. हें खूब वेदनादायी आसा”, अशें माखनान सांगलें.
भाजपा कॉर्पोरेट बॉण्डाचे पयशे खर्च करता
‘दुसरे वटेन सर्वोच्च न्यायालयान कॉर्पोरेट बॉण्डांचो जो पयसो संविधान विरोधी थारायला, तो भाजप कडेन आसा आनी ते तो खर्च करतात. मागीर देशांत लोकशाय खंय तिगून उरतली? देखून देशांत लोकशाय सोंपल्या. ही काँग्रेसीच्या खात्यांची टाळेबंदी करूंक ना, तर लोकशायेची टाळेबंदी केल्या. वेंचणुकेची घोशणा जावचे दोन सप्तकां आदीं खंयच्याय राजकी पक्षाचीं खातीं अशे तरेन गोठयतात तेन्ना लोकशाये परस चड व्हडलो हुस्को दुसरो खंयचो आसतलो. देशांत एकूच पक्ष वेवस्था आसतली काय? हेर सगळ्या पक्षांचे हिशेब गोठयतले काय? हेर पक्षांक अस्तित्वांत रावपाचो अधिकारुच ना काय” अशे प्रस्नूच अजय माखन हांणी उपस्थित केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
