भांगरभूंय | प्रतिनिधी
प्रतिनिधी, म्हापशें: पेडणें म्हालांतल्या एका सरकारी विद्यालयाच्या खेळां विभागांत ‘ग्राऊंडमन’ म्हणून काम करपी कर्मचार्यान आठवेक शिकपी विद्यार्थिनीचें अपहरण करून उपरांत तिचेर लैंगीक अत्याचार केल्ल्याचें उक्ताडार आयलां. समुपदेशना वेळार हें प्रकरण उक्ताडार आयले उपरांत तिच्या पालकांनी रोखडीच पुलीस स्टेशनाचेर कागाळ दिली. ही म्हायती मेळटांच तो कर्मचारी पळून गेलो. मोपा पुलिसांनी पॉक्सो आनी हेर कायद्यां खाला बलात्काराचो गुन्यांव नोंद केला.
दोन वर्सां सावन तो कामाक आसा. ताणें नोव्हेंबर २०२३ त हे चलयेचेर बलात्कार केल्ल्याचें १४ फेब्रुवारीक कळ्ळें. १४ फेब्रुवारीक शाळेंत समुपदेशन आयोजीत केल्लें. जी हुशार भुरगीं मानसीक ताणा खाला आसात, अभ्यासांत फाटीं आसात तांचे कडेन हें समुपदेश करताले. हातूंत एक हुशार चली फाटल्या दोन म्हयन्यां सावन भियेल्ले अवस्थेंत आशिल्लें. समुपदेशकांनी तिका विश्वासांत घेवन विचारल्या उपरांत आपले वांगडा फाटल्या दोन म्हयन्यांत कितें जालां तें तिणें सांगलें.
फाटल्या नोव्हेंबर सावन हे विद्यार्थीनीक तो ग्रावंडमन सतायता, अशें तिणें सांगलें. नोव्हेंबरांत ताणें तिचेर जबरदस्ती केल्ली. उपरांत बलात्कारूय केलो. इन्स्टाग्रामाचेर चॅटिंगूय केल्ल्याचें निदर्शनाक आयलें. उपरांत समुपदेशकान विद्यालयाच्या मुख्याध्यापकां कडेन संपर्क केलो. तिच्या पालकांक आपयले. मुख्याध्यापकांनी हाचो अहवाल वरिश्ठांक धाडला. पालकांनी मोपा पुलीस स्टेशनाचेर कागाळ दिल्या. हें कळटकच तो ग्रावंडमन फरारी जालो.
मजगतीं, ह्या ग्रावंडमनाचें एका राजकारण्यां कडेन सामके लागींचे संबंद आसात. ताका लागून हें प्रकरण चेंपपा खातीर तो राजकी चेंपण हाडपाचो यत्न करता अशें सुत्रां कडल्यान कळ्ळां. संबंधितांचेर योग्य ती कारवाय करूंक ना जाल्यार पुलीस स्टेशनाचेर मोर्चा हाडटले अशी शिटकावणी पालकांनी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
