भांगरभूंय | प्रतिनिधी
मुखेली रोहीत शर्मा आनी रवींद्र जडेजा हांच्या शेंकड्यां नेटार येजमान भारतान इंग्लंडा आड सुरू जाल्ले तिसरे टॅस्टीच्या पयल्या दिसा 5 विकेटी वगडावन 326 धांवड्यो केल्यात. पयल्या दिसाचो खेळ सोंपलो त्या वेळार जडेजा 110 आनी कुलदीप यादव 1 धांवडेचेर खेळटालो.
इंग्लंडा वतीन फास्ट बॉलर मार्क वुडान 3 विकेटी घेतल्यो. रोहीत आनी जडेजा हांणी चवथे विकेटी खातीर 204 धांवड्यांची म्हत्वाची भागिदारी केली. हे माळेंत भारता वतीन नोंदयिल्ली ही पयली शेंकड्याची भागिदारी थारली.
ते पयलीं भारतान टॉस जिखून पयलीं बॅटींग करपाचो निर्णय घेतलो. पूण, भारताची सुरवात बरी जाली ना. पयल्यो 3 विकेटी फकत 33 धांवड्यांचेर पडल्यो. यशस्वी जयस्वाल (10), शुभमन गील (0) आनी रजत पाटीदार (5) सवाय भितर तंबूंत परतले. ते उपरांत रोहीतान पांचवे सुवातेर बॅटिंगेक आयिल्ल्या जडेजा वांगडा 204 धांवड्यांची भागिदारी करून भारताचो डाव सांबाळ्ळो. ह्या दोगां खेरीत नवोदीत सरफराज खानान अर्द शेंकड्याची खेळी केली.
रोहीताचो टॅस्ट कारकिर्दींतलो हो 11वो शेंकडो थारलो. ताणें 196 बॉलांनी 14 चवके आनी 3 सक्यांचे मजतीन 131 धांवड्यो केल्यो. मार्क वुडाचे बॉलिंगेचेर बेन स्टोक्सान ताची कॅच धरली. वुडान हाचे पयलीं जयस्वाल आनी गील हांची विकेट घेतिल्ली.
दुसरे वटेन जडेजान कारकिर्दींतलो चवथो टॅस्ट शेंकडो मारलो. ह्या डावांत 212 बॉलांक तोंड दितना 9 चवके आनी 2 सके मारल्यात.
मजगतीं, टॅस्टींत पदार्पण करपी सरफराज खानान 48 बॉलांनी आपलो अर्द शेंकडो पुर्ण केलो. ताणें 66 बॉलांनी 62 धांवड्यांची खेळी केली. जडेजा वांगडा धांवडी घेतना घुस्पागोंदळ जाल्ल्यान सरफराज धांवबाद जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
