भांगरभूंय | प्रतिनिधी
भांगरभूंय । खबरां मेज
पणजीः मंगळुरूंत दोन दिसांचो विश्व कोंकणी समारोहांत विश्व कोंकणी पुरस्कार भेटयले. विमला वी पै विश्व कोंकणी जीवन सिद्धी पुरस्कार गोंयच्या रामानंद रायकार हाका, श्रेश्ट कोंकणी पुस्तक पुरस्कार डॉ. प्रकाश पर्येंकार आनी श्रेश्ट कविता पुरस्कार कोच्चीच्या आर. एस. भास्कर हांका भेटयलो. बस्ती वामन शेणै विश्व कोंकणी सेवा पुरस्कार मेटमोर्फ़ेस प्रतिष्टानची शकुंतला अजित भंडारकार तशेंच ‘स्नेहालय’ अनाथ आश्रमांचो जोसेफ़ क्रास्ता हांका भेटयलो. डॉ. पी. दयानंद पै विश्व कोंकणी रंग श्रेश्ट पुरस्कार कासगगोडचो रंगकर्मी श्रीनिवास राव हाका आनी डॉ पी. दयानंद पै विश्व कोंकणी श्रेश्ट अनुवाद पुरस्कार गोंयच्या रमेश लाड हांका भेटयलो.
मंगळुरू विश्व विद्यालयाचो कुलपती डॉ जयराज अमीन समारोहाक मुखेल सोयर म्हणून हाजीर आशिल्ले. समारोहाच्या पयल्या दिसा कोंकणी रंगमाचो फुडार, कोंकणीचे उदरगतीक कृत्राम बुद्धिमत्तेचो उपेग, बायल लेखिकांची कोंकणी साहित्याक देणगी, गोंयां भायर कोंकणीची स्थिती आनी कर्नाटकांल्या शाळांनी कोंकणी शिक्षण ह्या विशयांचेर चर्चासत्रां जाली. तांची येजमानकी डॉ कस्तुरी मोहन पै, डॉ किरण बुडकुले, गौरीश प्रभू, जॉन पेर्मन्नूर हांणी चलयली. दुसऱ्या दिसा कोंकणी विशीं अनिवासी भारतीयांक हुस्को, 21 व्या शेंकड्यांतली कोंकणी कविता ह्या विशयाचेर चर्चा जाली. ह्या दिसा गोंयच्या ‘दी स्केलेटन वुमन’ आनी कोच्ची कलाक्षेत्रा वतीन ‘जगले वयलो हनुमंत’, मुंबय कलाकारांचो ‘आवसु ती आनंदाचो पावसु’ आनी कासरगोडु चिन्नां हांचो ‘एकलो आनेकलो’ ह्या नाटकाचे प्रयोग जाले. सगल्या प्रयोगांक प्रेक्षकांचो बरो प्रतिसाद मेळ्ळो
समारोहाक विश्व कोंकणी केंद्राचो अध्यक्ष सीए नंदगोपाल शेणै, भांडारी बी. आर. भट्ट, उपाध्यक्ष डॉ. किरण बुडुकुले आनी गिलबर्ट डिसोजा विश्वस्थ डॉ. कस्तुरी मोहन पै, रमेश नायक, पय्यनूरु रमेश पै, , वतिका पै, मेल्विन रॉड्रीग्ज, विलियम डिसोजा, बी. देवदास पै हाजिर आशिल्ले. विश्व कोंकणी केंद्राच्या टी व्ही मोहनदास पै आनी डॉ पी दयानंद पै हाणी समारोहाक परबीं भेटयलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
