भांगरभूंय | प्रतिनिधी
भांगरभूंय । खबरां मेज
पणजीः गोंयच्या पुरातत्व खात्यान घोशीत केल्ल्या ‘फ्रंटीस पीस ऑफ सांकवाळ’ ह्या दायज सुवातेर गोंय आनी दमणच्या आर्चडायोसीस 18 फेब्रुवारीक आयोजीत केल्ले पदयात्रेक (वॉकींग पिलग्रीमेज) सरकारान परवानगी दिवची अशी मागणी श्री विजयादुर्गा मंदीर संवर्धन समितीन बिरेस्तारा एक पत्रकार परिशद घेवंन केल्या. पत्रकार परिशदेक नितीन फळदेसाय, जयेश थळी, संदीप पाळणी, विनोद वारखंडकार, गोविंत चोडणकार, गणेश गावडे आनी शुभा सावंत हे समितीचे वांगडी हाजीर आशिल्ले.
मुरगांव नियोजन आनी उदरगत प्राधिकरण (एमपीडीए) आनी पुरातत्व खात्याच्या अधिकाऱ्यांनी फाटल्या डिसेंबर म्हयन्यांत ह्या दायज सुवातेर जोड सर्वेक्षण केल्लें त्या वेळार तांका बेकायदेशीर गजाली दिसून आयल्यो अशें जयेश थळीन सांगलें. पुरातत्व खात्याची परवानगी घेनास्तना क्रेनीन माटोव उबारप, दायज सुवातेच्या एक मीटर अंतराक जमीन खणून खांबे उवारून मंडपाचें बांदकाम करप, दायज सुवातेच्या प्रवेश करपाच्या मार्गार झेंडें लावपाक 18 लोखणाचे पायप लावप, लोखणाचे 7 ल्हान आनी एक व्हड क्रॉस उबारप हाचो तातूंत आसपाव आसा. सर्वे प्लॅनांत अस्तित्वांत नाशिल्लें एक बांदकाम दायज सुवाती पसून 15 मीटर अंतराक केल्या. दायज सुवातेंत उदका टाक्या बसोवप, सुरक्षारक्षकां खातीर कुडी बांदप ह्यो बेकायदेशीर गजाली केल्यात अशें थळी हाणे सांगलें.
सरकारी यंत्रणेच्या सर्वेक्षणांतल्या हे सुवातेर बेकायदेशीर गजाली करून लेगीत जे दोशी आसात तांचेर कारवाय करपाचें सोडून सरकाराच्या संबंदीत खात्यांच्या सहकार्यान हे सुवातेर 7 तें 16 जानेवारीक फेस्ताचें आयोजन केल्लें. पुरातत्व खात्यान दाजय सुवातांनी फेस्ता सारक्या कार्यावळींक परवानगी दिवचे नात अशें अधिकृतपणान सांगिल्लें हाची नितीन फळदेसायान याद करून दिली. फ्रंटीस पीस ऑफ सांकवाळ ह्या दायज सुवातेचें नेमा प्रमाण संवर्धन जावचें हे खातीर पुरातत्व खातं, गोंय प्रशासन, पुलीस खात्याक निवेदना सादर केल्यांत पूण तांची ह्या सुवाते कडेन आडनदर चल्ल्या असो आरोप ताणे केलो. सरकारी यंत्रणेन कसल्याचे चेंपणाचे भकीक पडनासतना न्याय दिवचो. हाचेर तोडगो काडलो ना जाल्यार अयोध्येंतल्या श्रीराम मंदिरा खातीर जे तरेन संघर्श जालो तशो संघर्श हे सुवातेर जावपाची शक्यताय न्हयकारपाक जायना. गरज पडल्यान न्यायालयांत वचपाची आमची तयारी आसा अशें संवर्धन समितीच्या वांगड्यांनी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
