भांगरभूंय | प्रतिनिधी
पणजी ः कोरगांवां स्कुटरी वयल्यान अडेज लाखांचो गांजो व्हरपी दोग तरणाट्यांक पेडणें पुलिसांनी अटक केल्या. शुभम समरनाथ शर्मा (27, मुरमुसेवाडो- तुयें) आनी गोपीनाथ हरमलकार (25, गावडेवाडो, मोरजी) अशीं दुबावीतांचीं नांवां आसात.
गिरायकाक ड्रग्स पुरवण करपाक दोन तस्कर येतात अशी म्हायती पेडणें पुलिसांक मेळ्ळी. ते प्रमाण पुलिसांच्या पंगडान रातीं सांपळो रचलो आनी कोरगांवांत लिपून रावले. उपरांत स्कुटरी वयल्यान वचपी ह्या तरणाट्यांक पुलिसांनी धरलें आनी तांची तपासणी केली. ते वेळार तांचे कडेन गांजो सांपडलो. ताचें मोल 2.50 लाख इतले आसा. पुलिसांनी गांजा सयत एक यामाहा स्कुटर आनी दोन मोबायल फोन जप्त केल्यात. तशेंच दोगांय दुबावितां आड गुन्यांव नोंद करुन तांका अटक केल्या.
पेडणेंचे उपविभागीय पुलीस अधिकारी जीवबा दळवी हांच्या मार्गदर्शना खाला पुलीस निरीक्षक सचिन लोकरे हांच्या देखरेख खाला उपनिरीक्षक विवेक हरमलकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
