भांगरभूंय | प्रतिनिधी
भांगरभूंय । प्रतिनिधी
पेडणेः तोरशें पंचायतीच्या उपसरपंचपदार रमेश गंगाराम बुटे हाची बुधवारा विरोधा विणे निवड जाली. उत्तम वीर हाणे राजिनामो दिल्ल्यान हें पद रिकामें जाल्लें.
उपसरपंचपदा खातीर जाल्ल्या पंचायत मंडळाचे खाशेले बसकेंत आत्माराम तोरस्कारान बुटे हाचें नांव सूचयलें आनी छाया शेट्येन ताका अनुमोदन दिलें. बसकेक सरपंच स्वाती तोरस्कार , प्रार्थना मोटे, आत्माराम तोरस्कार, छाया शेट्ये, पूजा साटेलकार आनी आत्माराम बुटे हे पंच वांगडी हाजीर आशिल्ले.
उपसरपंचपदा खातीत रमेश बुटे हाचोच उमेदवारी अर्ज आयिल्ल्यान पेडणे गट विकास कार्यालयाले भिवा ठाकूर ह्या निर्वाचन अधिकाऱ्यान ताची विरोधा विणे निवड जाल्ल्याचें जाहीर केलें. बुटे हाचे पेडण्याचो आमदार प्रवीण आर्लेकार, उगवेचो सरपंच सुबोध महाले,आदले जिल्हो पंचायत वांगडी रमेश सावळ, सूर्यकांत तोरस्कार हाणी अभिनंदन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
