भांगरभूंय | प्रतिनिधी
भांगरभूंय । प्रतिनिधी
फोंडेंः साकोड्डें तें गुळेली मजगतीच्या अशीर रस्त्या वयल्यान लाकडाची बेकायदेशीर येरादारी चलिल्ल्याची खबर दिसाळ्यांनी प्रसिद्ध जातगीर कुळे रान विभागान पुराय रानाची तपासणी केली. बुधवारा तांका भोमकटो- कुमारवाडो हांगच्या रानांत खैरीच्या झाडांची केल्ली कत्तल दिसली. ह्या रान वाठारांत लाकूड चोरांची टोळी वावुरता हें आतां सिद्ध जालां.
वाळपय रानां विभागान आठ दिसां आदीं गुळेली हांगा कारवाय करून लाकडाची येरादारी करपाक हाडल्ली सुमो जप्त केल्ली. ताचें कनेक्शन साकोड्डें वाठारांत आशिल्ल्याचो दुबाव राना अधिकाऱ्यांनी उक्तायल्लो. साकोड्डें वाठारांत एक टोळी लाकूडांची तस्करी करता अशें थळावे लोक सांगतात. कुळे रानां विभागान ती गजाल गंभीरपणान घेवन रानांत वचून पळोवणी केली तेन्ना ताकां खैरी मारून वडयल्लयाचें दिसलें. ह्या प्रकरणांत अजून कोणाक अटक केली ना.
साकोड्डें वाठारांतल्या लाकूड चोर टोळयेचो संबंद राजकी व्यक्ती तशेंच वरिश्ठ सरकारी अधिकाऱ्या कडेन आशिल्ल्यान कागाळी करून लेगीत कारवाय जायना म्हणून थळावे लोक तिडक उक्तायतात. बुधवारा खैरी मारून वडयल्ल्याचें दिसून आयिल्ल्यान आता दुबावितांचेर कारवाय जावपाची शक्यताय वाडल्या. साकोड्डें तें गुळेली मेरेन रस्तो अशीर आसलो तरी रातयां थंय जायत्या फावट अवजड वाहनां तशेंच चार चाकी वाहना यो-वच करतात अशी म्हायती थळाव्या लोकांनी दिल्या. आलिशान वाहनांनी वेगवेगळ्या तरेचें लाकूड व्हरतात अशें लोक सांगतात ताका लागून ह्या रस्त्यार गस्त दवोरची अशी तांची मागणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
