भांगरभूंय | प्रतिनिधी
भांगरभूंय । प्रतिनिधी
पणजीः म्हादय संदर्भांत केंद्र सरकारान स्थापन केल्ल्या ‘प्रवाह’ची पयली बसका मंगळारा पर्वरी जाली. म्हादय न्हंये वयल्या प्रकल्पां सयत व्हाळांची प्रत्यक्ष पळोवणी करप तशेंच गोंय, कर्नाटक आनी महाराष्ट्र ह्या तीन राज्यां मदलो व्हो वाद सामोपचारान मिटोवपाचो निर्णय हे बसकेंत घेतलो अशी म्हायती प्रवाहाचो अध्यक्ष पी एम स्कॉट हाणे पत्रकारांक दिली.
म्हादयचें उदक कांय प्रमाणांत घुंवडावपाक मान्यताय दितले पूण ते खातीर सविस्तर प्रकल्प आराखडो (डीपीआर) तयार करचो पडटलो. ते उपरांत केंद्राची मान्यताय घेवंन काम करचें पडटलें. गोंय,कर्नाटक आनी महाराष्ट्र ह्या तीन राज्यांत फाटल्या जायत्या वर्सां सावन व्हो वाद सुरू आसा. ह्या तिनूय राज्यांक विस्वासांत घेवंन सामोपचारान तो सुटावो करपाचो यत्न आपली समिती करतली. पयली बसका गोंयांत जाली. फुडली बसका कर्नाटक ना जाल्यार महाराष्ट्रांत घेतले अशें स्कॉट हाणे सांगलें.
म्हादयचो विशय सध्या सर्वोच्च न्यायालयांत प्रलंबीत आसा. म्हादय वयल्या कळसा- भांडुरा प्रकल्पाच्या डीपीआराक केंद्रीय जल आयोगान मान्यताय दिल्या उपरांत गोंयांत म्हादयचो विशय परत तापल्लो. ताचे वयल्यान विरोधकांनी सरकाराचेर हल्लाबोल केल्लो. केंद्रांत आनी राज्यांत भाजपाचे डबल इजीन सरकार आसतनाय राज्य सरकार डीपीआराची मान्यताय फाटीं घेवपा खातर कित्याक यत्न करता, केंद्राचेर चेंपण कित्याक हाडना अशे प्रश्न विरोधकांनी उपस्थीत केल्ले. मुख्यमंत्री डॉ प्रमोद सावंत हाणे केंद्रीय फुडाऱ्यां कडेन चर्चा सुरू केल्या उपरांत केंद्रान प्रवाह समितीची स्थापन करून ताचें मुख्यालय गोंयांत स्थापन केल्लें. समिती स्थापन करून लेगीत जायते म्हयने जाले तरी तिची बसका जाली नाशिल्ली. विधानसभेंत विरोधक परत आक्रमक जाल्या उपरांत उदका स्रोत मंत्री सुभाष शिरोडकार हाणे प्रवाहाची पयली बसका मंगळाराक जातली अशें स्पश्ट केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
