गुलाब : मोगाचें प्रतीक

भांगरभूंय | प्रतिनिधी

व्हॅलेंटायन दीस म्हणजे तांबडो गुलाब दिवन आपलो मोग व्यक्त करप. दुसऱ्याचो तुमचेर आशिल्लो मोग ताका कळोवपाचें काम गुलाब करता. गुलाब आपल्या परमळान मन धादोशी करता. एकमेकांचेर जीव जडटा.

फेब्रुवारी हो मोगाचो, मोग करणाऱ्यांचो खास म्हयनो. 14 फेब्रुवारी हो दीस व्हॅलेंटायन दीस म्हूण पुराय भारतांत लाखांनी लोक व्हड दबाज्यान मनयतात. त्या वेळार मोगी जोडपीं एकमेकांक तांबडे टवटवीत गुलाब भेटयतात. गुलाब हें मोगाचें शुभ प्रतिक मानतात. एक सप्तका पयलीं रोझ डे, प्रपोज डे, चाॅकलेट डे, टेडी डे, हग डे, कीस डे अशे तरेकवार दीस वेगवेगळ्या रंगांचें गुलाब दिवन मनयतात. ही विदेशी पद्दत, पूण भारतांतल्या तळागाळांत पावल्या. बाजारपेठेक ह्या दिसा करोडांनी रुपया फायदो जाता.

14 फेब्रुवारीक फक्त तांबड्या रंगाचे गुलाब मोगी मोगिकेक दिता वा ती ताका दिता. तशें पळोवंक गेल्यार गुलाबाच्या फुला सारकें सोबीत फूल ह्या सैमांत दुसरें कसलेंच ना. सैमान ह्या फुलाक व्हडा फुरसतीन तयार केलां, अशें समजुया. सैमान शेंकड्यांनी रंगबेरंगी फुलां फुलतात. पूण गुलाबाचें फुल मोहक, नाजूक, ल्हान- व्हड पाकळ्यांनी भरिल्लें आसता. ताका वासूय बरो येता. मन प्रसन्न जाता. 

गुलाबाचें फूल खंयचेय मातयेंत, कुंडीत पसून जाता. चड करून तें तोडून केंसांत घालपाचें आकर्शण दरेके बायलेक जाता. गुलाब माळून जण एकली स्वताक हारशा मुखार तोखेता.

गुलाब तरेकवार रंगाचें. तांबडे, हळडुवे, केसरी, गुलाबी, निळे. परदेसांत काळे पसून आसात. गुलाब हे नाजूक. तांकां चुकून पसून हात लागलो जाल्यार पाकळ्यो गळून पडटात. ताका कोणे सोंपपणी हात लावचो न्हय म्हूण सैमान तांचे सरभोंवतणी कांट्यांचें संरक्षण तयार केलां. म्हणटात न्हय, कांट्या बगर गुलाब ना. आदल्या तेंपा सावन गुलाबाक फुलांचो राजा म्हूण भोवमान मेळिल्लो आसा. कसलोय दबाजो जावं, मागीर तें उक्तावण, वाडदीस, लग्न सुवाळो, जात्रा सगले कडेन गुलाब दिसतात. लोक मानाचें प्रतिक म्हूण गुलाब भेट दितात. भारताचे पयले प्रधानमंत्री पं. जवाहरलाल नेहरू हे सदांच आपल्या कोटाक गुलाबाचें फूल लायताले. शिर्डीच्या साईबाबाक गुलाबाचे व्हडले हार ओंपतात. सगले सण, खोशेचे दीस गुलाबा विणें अर्दकुटे. मान, सन्मान, मोग हाचें प्रतीक म्हणल्यार गुलाब. 

व्हॅलेंटायन दीस म्हणजे तांबडो गुलाब दिवन आपलो मोग व्यक्त करप. दुसऱ्याचो तुमचेर आशिल्लो मोग ताका कळोवपाचें काम गुलाब करता. गुलाब आपल्या परमळान मन धादोशी करता. एकमेकांचेर जीव जडटा. आयुर्वेदांतूय गुलाबाचे वखदा खातीर उपेग सांगल्यात. गुलाब पाणी, सरबत, सुगंधी साबू, अत्तर. गुलाबाचो पाकूय करतात. 

तर असो हो गुलाब. मोहक, सुंदर, मनभुलोवणो. मोगाचें प्रतीक आनी सगल्या फुलांचो राजा. सगल्यांत व्हॅलेटायन दीस खोशेचो वचूं. 

– सिद्धी तिळवे