भांगरभूंय | प्रतिनिधी
बनावटगिरी प्रकरणांत चार जाणांचे टोळयेक अटक
म्हापशें: लॅण्ड डिलिंगांतल्या अर्थीक वेव्हारा खातीर दुसऱ्याच एका मनशान बनावट आधारकार्ड आनी पेनकार्ड तयार करून त्या आदाराचेर म्हापश्यां एका बँकेंत खातें उक्तें करून फटवणूक आनी बनावटगिरी केल्ल्या प्रकरणांत म्हापशें पुलिसांनी चार जाणांचे टोळयेक अटक केली.
अटक केल्ल्या दुबावितां मदीं रझाक बेलवाडी (26, आमीरांदोवाडो पेन्ह दी फ्रान्स, पर्वरी), गौतम कोरगांवकार (38, ग्रॅण्ड चिवार हणजूणें), देवानंद कवळेंकार (43, मायनावाडो, पिळर्ण) आनी राहूल पाडलोस्कार (38, बोग दी वॉक, पणजी) ह्या चार जाणांचे टोळयेक अटक केली.
पुलिसांनी कागाळदार मुकूंद सखाराम रावत (वयलोवाडो साळ, दिवचल) हांच्या कागाळीच्या आदारान ही कारवाय केली. फाटल्या 12 फेब्रुवारी 2024 दिसा पयलीं हो गुन्यांव घडलो. म्हापशेंच्या टीजेएसबी सहकारी बँकेचे कर्मचारी बँक खात्याच्या चवकशे खातीर कागाळ केल्ल्याच्या घरा गेले तेन्ना ह्या बनावटगिरीचो प्रकार उक्तडार आयलो.
कागाळदार रावत हांच्या नांवांन टीजेएसबी बँकेच्या म्हापशें फांट्यांत खातें उक्तें केल्लें. ह्या खात्या वतीन साडेतीन लाखांचो अर्थीक वेव्हार केल्लो. बँकेचे अधिकारी चवकशे खातीर आयले तेन्ना रावत हांणी आपणें बँकेंत खातें उगडूंक नाशिल्ल्याचें सांगलें.
उपरांत कागाळदार सदर बँकेंत आयलो तेन्ना खातें उक्तें करपा खातीर दुबावितांनी वापरिल्ल्या कागदपत्रांतलें आधारकार्ड आनी पेनकार्ड तांचेंच आशिल्लें. पूण ताचे वेलो फोटो मात दुसऱ्याचोच म्हणल्यार दुबावीत रझाक बेलवाडी हाचो आशिल्लो हें स्पश्ट जालें.
उपरांत कागाळदारान रोखडेंच म्हापशें पुलिशेंत रितसर कागाळ दाखल केली. ते प्रमाण पुलिसांनी चवकशी करून सोमारा 12 वेर रातीं पयलो दुबावीत आरोपी रझाक हाका धरलो आनी ताब्यांत घेतलो. उपरांत ह्या प्रकरणांत दुबाविताच्या आदारान गौतम, देवानंद आनी राहूल ह्या तिगां वांगड्यांक धरून ताब्यांत घेतले. दुबावितां आड भा.दं.सं.च्या 419, 464, 465, 466, 467, 468, 471, 477, 420 आनी 34 कलमा खाला गुन्यांव नोंद करून चारूय जाणांक अटक केली.
पुलीस निरिक्षक सीताकांत नायक हांच्या मार्गदर्शना खाला उफनिरिक्षक यशवंत मांद्रेंकार, विराज कोरगांवकार, बाबलो परब, हवालदार सुशांत चोपडेंकार, कॉन्सटेबल सिध कांबळी, प्रकाश पोळेकार आनी आनंद राठोड ह्या पंगडान ही कामगिरी केली. फुडलो तपास वरिश्ठांच्या मार्गदर्शना खाला पुलीस करतात.
दुबावीत आरोपी हे जमीन वेव्हारांत (लॅण्ड डिलींग) कार्यरत आसून ह्या अर्थीक वेव्हारांतले धनादेशाच्या माध्यमांतल्यान मेळपी रक्कम जमा करप आनी उपरांत ती सगल्यां मदीं वांटून घेवप, हे खातीर दुबावितांनी बँक खातें उगडपाची ही तकली लडयिल्ली. अशेच तरेन तांणी अजून कांय जाणांच्या नांवान बँकांनी खातें उगडलां बी आसुये असो दुबाव पुलिसांनी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
