भांगरभूंय | प्रतिनिधी
संवसारीक कुस्ती म्हासंघान म्हत्वाचो निर्णय घेत भारतीय कुस्ती म्हासंघाचें निलंबन फाटीं घेतलें. भारतीय कुस्ती म्हासंघाच्या अध्यक्षपदाचे वेंचणुके उपरांत बरोच वाद जाल्लो आनी संवसारीक कुस्ती म्हासंघाक हस्तक्षेप करचो पडिल्लो.
भारतीय कुस्ती म्हासंघाक योग्य वेळां वेंचणूक घेवपाक अपेस आयिल्ल्यान संवसारीक कुस्ती म्हासंघान पोरूं 23 ऑगस्टाक भारतीय कुस्ती म्हासंघाक तात्पुरते रितीन निलंबीत केल्लो.
भारतीय कुस्ती म्हासंघाचो वाद बरोच गाजिल्लो. तेन्नाचे अध्यक्ष ब्रीजभुषण शरण सिंगाचेर बायलांच्या कुस्ती खेळगडयांनी गंभीर आरोप केल्यात. ब्रीजभुषणान बायल खेळगडयां सयत प्रशिक्षकांचोय लिंगीक छळ केल्ल्याचो आरोप आसा. ताका लागून तो परतून एकदा अध्यक्षपदाची वेंचणूक लडपाक शकना.
मजगतीं, संवसारीक कुस्ती म्हासंघान निलंबनाचो मुखा वयलो आढावो घेवपा खातीर 9 फेब्रुवारीक बसका आपयिल्ली आनी सगले घटक आनी म्हायती विचारांत घेतल्या उपरांत निलंबन फाटीं घेवपाचो निर्णय घेतलो.
संवसारीक कुस्ती म्हासंघान भारतीय कुस्ती म्हासंघाक वेंचणूक परतून घेवपाचो निर्देश दिला. ह्या आयोगाचो उमेदवार सक्रीय खेळगडो आसूंक जाय वा निवृत्त जावन चार वर्सां परस चड वर्सां जाल्ली आसूंक फावना अशे निर्देश संवसारीक कुस्ती म्हासंघान दिला. मतदार खास करून खेळगडे आसतले. ही वेंचणूक 1 जुलय 2024 उपरांत खंयचेय वरिश्ठ राष्ट्रीय सर्ती वेळार जातली.
सगल्या कुस्ती खेळगड्यांक भारतीय कुस्ती म्हासंघाच्या सगल्या सर्तींनी खासा करून ऑलिम्पीक खेळांत आनी हेर खंयच्याय मुखेल राष्ट्रीय आनी आंतरराष्ट्रीय सर्तींनी कसलोच भेदभाव करिनासतना वांटो घेवंक दितलो अशी संवसारीक कुस्ती म्हासंघान भारतीय कुस्ती म्हासंघाक लेखी हमी दिवपाक सांगल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
