भांगरभूंय | प्रतिनिधी
भांगरभूंय । प्रतिनिधी
केपेंः गोयांतल्या अनुसूचीत जमाती खातीर (एसटी) मतदारसंघ राखीव दवोरपा संबंदात केंद्र सरकारा कडेन बाजू मांडपा खातीर शिश्टमंडळ व्हरपाची घोशणा मुख्यमंत्री डॉ प्रमोद सावंत हाणी राज्य विधानसभेंत केल्या. त्या शिश्टमंडळात मिशन पॉलिटिकल रिझर्वेशनाच्या (एमपीआर) वांगड्याचो आसपाव करपाची मागणी मिशनाचो अध्यक्ष अॅड जॉन फर्नाडीस हाणे केल्या.
चाळीस मतदासंघांतले उण्यात उणे चार मतदारसंघ एसटी खातीर राखीव दवोरपाची मागणी एसटी समाज संघटनां वतीन केल्या. सरकारान ती मानून घेवची हे खातीर विधानसभेचेर मोर्चा व्हेल्लो. गांवगांवांनी एसटी समाज भावांच्यो बसका जातात. एसटी समाजाक मतदारसंघ राखीव दवोरपाक खंयच्याच राजकी पक्षाचो विरोध ना. मात हे आरक्षण जाता तितल्या बेगीन मेळचें हें खातीर दिल्लींत सर्व पक्षीय शिश्टमंडळ व्हरपाचें राज्य सरकारान थारायलां. तातूंत आमचो वांगडी आसपाक जाय अशें फर्नाडीस हाणे पत्रकारां कडेन उलयतना सांगलें.
मिशन पॉलिटिकल रिझर्वेशनान एसटी समाजाक राजकी आरक्षणाचो विशय लावंन धरला. 16 फेब्रुवारीक दिल्लींत शिश्टमंडळ व्हरपाचें मुख्यमंत्र्यांनी जाहीर केला. मतदारसंघ राखीवता मागणे संबंदी आमचो बरो अभ्यास आसा. केंद्रीय फुडाऱ्यां सामकार आमी व्हो विशय बरे तरेन मांडपाक शकतले असो दावो जॉन फर्नांडीस हाणे केला. गोंयांत एसटी समाजाची लोकसंख्या सुमार 10 टक्के आसा ताका लागून चार मतदारसंघ तांचे खातीर राखीव आसपाक जाय अशें आदिवासी संघटनेचो अध्यक्ष कायतान कार्व्हालो हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
