भांगरभूंय | प्रतिनिधी
भांगरभूंय । प्रतिनिधी
पणजीः घोवा कडल्यान वादाक लागून आपल्या चार वर्सां पिरायेच्या चल्याचो खून केल्ल्याचो आरोप आशिल्ल्या बंगळुरूतल्या आर्टिफिशिल इंटेलिजन्स कंपनीची संस्थापिका आनी सीइओ सूचना सेठ हिची मानसीक स्थिती सामकी बरी आशिल्ल्याचें तिचे बांबोळीच्या मानसोपचार संस्थेंत (आयपीएचबी) केल्ला वैजकी चांचणेंतल्यान स्पश्ट जाला. तसो अहवाल कळंगुटे पुलिसांनी भुरग्यां न्यायालयांत सादर केल्या अशी म्हायती सूत्रांनी दिली. मजगतीं सूचनाचे न्यायालयीन कादयेंत आनीक 14 दिसांची वाड केल्या.
सूचनाची मानसीक स्थिती सारकी नाशिल्ल्यान तिच्या हातांतल्या चल्याचो खून करपाची घडणूक जावपाक शकता. ताका लागून तिची मानसीक स्थितीची तपासणी करपाची मागणी तिच्या बापायन एका अर्जा वरवीं न्यायालयाक केल्ली. ह्या अर्जाचेर पुलिसांक आपलें म्हणणे मांडपाक न्यायालयान सांगल्लें. ते प्रमाण तांणी मानसीक स्थितीचो अहवाल न्यायालयाक सादर केलो.
सूचनाक फाटल्या 7 जानेवारीक सिकेरी- कांदोळी हांगच्या एका हॉटेलांत आपल्या चल्याचो खून केल्या उपरांत हाताची शीर कापून आत्महत्त्या करपाचो यत्न केल्लो. चल्याची कूड सुटकेसीत भरून टॅक्सीन बंगळुरूक वतना कळंगुटे पुलिसाच्या सादूरपणाक लागून ती पुलिसांक सांपडली. कर्नाटक पुलिसांनी तिका अटक करून कळंगुटे पुलिसाचे सुवादीन केल्लें. मंगळाराक तिका भुरग्यां न्यायालयांत हाजीर केले तेन्ना तिच्या न्यायालयीन कादयेची मुजत सोपल्ल्यान तिका आनीक 14 दीस मुजत वाडोवन दिली. फुडली सुनावणी 26 फेब्रुवारीक जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
