भांगरभूंय | प्रतिनिधी
भांगरभूंय । प्रतिनिधी
मुरगांवः वास्को शारांतल्या स्वातंत्र्य पथाच्य कुशीक आशिल्ल्या मुरगांव पालिकेच्या भुरग्यां खातीरच्या उक्ता गार्डनांत फूड कोर्ट उबारपाचें काम न्यायालयीन आदेशाचें उल्लंघन करून चलल्ल्याचो आरोप करून काँग्रेस फुडारी नाजीर खान हाणे पंदरा दिसांत हें काम बंद केलें ना जाल्यार न्यायालयान अवमान याचिका सादर करपाची शिटकावणी दिल्या.
स्वातंत्र पथा कुशीक पालिकेची भुरग्यांक खेळपा खातीर दोन गार्डना आसात. भुरग्यांक खेळपा खातीर ही सुवात राखीव आसतना मुरगांव पालिका मंडळान थंय फूड कोर्ट उबारपाचें काम चलयलां. हे काम बेकायदेशीर आनी न्यायालयाच्या आदेशाचें उल्लंघन करपी आसा. थळावो नगरसेवक आनी लोक प्रतिनिधींनी ह्या कामाक विरोध करपाक जाय आशिल्लो. हे फुड कोर्टाचें बांदकाम बंद करून तें दुसरे सुवातेर व्हरचे अशी मागणी नझीर खानान केल्या. 15 दिसांत काम बंद केलें ना जाल्यार न्यायालयांत वचपा खेरीर आपल्या कडेन दुसरो पर्याय आसचो ना अशें ताणे सांगलां.
मुरगांव पालिकेचो नगराध्यक्ष गिरीश बोरकारान नझीर खानाचो आरोप न्हयकारला. हें फूड कोर्ट बांदकाम कायदेशीर आसा. पालिका मंडळाचे बसकेंत सगल्या नगरसेवकांनी ताका मान्यताय दिल्या. केंद्र सरकाराचे येवजणे खाला मुरगांव पालिका आनी वाळपय पालिका मंडळाक फूड कोर्ट उबारपाक मान्यताय मेळ्ळ्या अशी म्हायती बोरकारान दिली. केंद्र सरकाराच्या नगर विकास येवजणे खाला ह्या फूड कोर्टाचें बांदकाम चल्लां. ताका लागून थळाव्या तरणाट्यांक रोजगारीची संद मेळटली. बऱ्या उपक्रमांक विरोध करप सारकें न्हय अशें बोरकारान नझीर खानाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
