भांगरभूंय | प्रतिनिधी
भांगरभूंय । प्रतिनिधी
कुडचडेंः दिव्यांग भुरग्यां खातीर हॉस्टेल उबारपाची सरकाराची तयारी आसा. खंयचेय संस्थेन ते खातीर फुडाकार घेतल्यार तांका सरकारा वतीन सगली मजत करतले अशें मुख्यमंत्री डॉ प्रमोद सावंत हाणे कुडचडें हांगा संजय स्कुलाच्या नवे इमारतीचो बुन्यादी फातोर बसोवपाचे कार्यावळींत उलयतना सांगलें. ह्या वेळार कुडचड्याचो आमदार नीलेश काब्राल, संजय स्कुलाचो अध्यक्ष आनी आदलो आमदार सिद्धार्थ कुंकळ्येकार, कुडचडे- काकोड्याचो नगराध्यक्ष प्रदीप नायक, उपनगराध्यश्र रुचा वस्त, जिल्लो पंचायत वांगडी सिद्धार्थ गांवस देसाय, शेल्डेंची सरपंच कविता गांवस देसाय, सरकारी अधिकारी प्रसाद लोलयेंकार हाजीर आशिल्ले.
राज्यांत एक लेगीत दिव्यांक भुरगें साधन सुविधा पसून वंचीत रावचें न्हयहे खातीर यत्न चल्ल्यात. बांबोळे जीएमसीत तांच्या खातीर सुविधा तयार केल्यात. दिव्यांक भुरग्यांक शिकोवपाचें काम संबंदीत शिक्षक बरे तरेन करतात. कुडचड्यार संजय स्कुलाक सगल्यो आधुनीक सुविधा आसतल्यो. नवी इमारत वेळार बांदून पुराय करपा कडेन लक्ष दिवपाक जाय. दिव्यांग भुरग्यां खातीर कुडचडें हें गोंयांतले एक बरें केंद्र जातले असो हावेस मुख्यमंत्र्यान उक्तायलो. कोवीड म्हामारीक लागून कुडचडें मतदारसंघात बसस्टॅण्ड, स्विमींग पूल आनी हेर प्रकल्प वेळार जावपाक शकले नात. फुडल्या तीन वर्सांत ते पुराय करपाचें आस्वासन ताणे दिलें.
1992 वर्सा कुडचड्यार संजय स्कुलाची सुरवात दोन क्लास रुम घेवंन केल्ली. नवे इमारतींत 28 क्लास रुम आनी हेर सुविधा आसतल्यो अशी म्हायती नीलेश काब्राल हाणे दिली. राष्ट्रीय शिक्षणीक धोरणाचें म्हत्व मुख्यमंत्र्यांक पटलां आनी ताणे तातूंत विशेश लक्ष घातलां. संजय स्कूल केंपे- सांगें वाठारांत आदर्श थारतलें असो विस्वास सरकारी अधिकारी प्रसाद लोलयेकारान उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
