भांगरभूंय | प्रतिनिधी
भांगरभूंय । प्रतिनिधी
पणजीः कला आनी संस्कृती खात्याच्या निधी वितरणा वयल्यान सभापती रमेश तवडकार आनी मंत्री गोविंद गावडे मदीं उप्रासल्लो वाद न्हिवत आसतनाच तवडकार हाणे आपल्या ‘श्रमधाम’ येवजणे खाला गावडे हाच्या प्रियोळ मतदारसंघात गरीब घराब्यां खातीर घरा बांदून दिवपाचें थारायल्ल्यान ते परत एक फावट आमने- सामने येवपाची शक्यताय आसा.
वैयक्तीक कारणा खातीर आपूण फाटल्या आयताराक प्रियोळा गेल्लो. त्या वेळार भाजपाच्या थंयच्या वावुरप्यांनी आपल्या सामकार प्रियोळांतल्या गरीब घराब्यांक श्रमधाम येवजणे खाला घरां बांदून दिवपाचो प्रस्ताव दवोरलो. ताका लागून गरजू नागरिकां कडल्यान प्रस्ताव येतले तशें तांका घरां बांदून दिवपाचो निर्णय आपणे घेतला अशें सभापती तवडकार हाणे ह्या प्रतिनिधीक सांगलें.
श्रमधाम येवजणे खाला काणकोण मतदारसंघांत आतां मेरेन 20 जाणांक घरां बांदून दिल्यात. ही येवजण गोंयांतल्या सगल्या मतदारसंघांत लागू करपाचो म्हजो संकल्प आसा. काणकोण उपरांत आतां प्रियोळ,सांगें, केंपें आनी सावड्डें मतदारसंघांत्ल्या गरीब लोकांक घरां बांदून दितले. ह्या वर्सा अशे तरेची शंबर घरां उबारपाचो आपलो विचार आसा अशें ताणे सांगलें.
अर्थीक परिस्थिती बरी नाशिल्ल्या तशेंच वेगवेगळ्या कारणांक लागून सरकारी येवजण्यांचो लाब घर बांदपाक घेवपाक शकनात तांका श्रमधाम येवजणेतल्यान घरां बांदून दितात. सभापती रमेश तवडकार हाणे चालीक लायिल्ल्या ह्या येवजणेची गोंयां सयत शेजारच्या महाराष्ट्रांत चर्चा जाता. गावडे हाच्या वांगडचो वाद मिटल्ले कडेन आसतना ताच्या प्रियोळ मतदारसंघांत तवडकार हाणे घरें बांदून दिवपाची हमी दिल्ल्यान गावडे परत आक्रमक जावपाची शक्यताय आसा.
अनाथ भांवड्यांक दितलो घर
सभापती रमेश तवडकार हाणे चालील लायिल्ल्या श्रमधाम येवजणेचो प्रचार महाराष्ट्रांत जाला. थंयच्या सांगली- मिरज वाठारांतल्या एका गांवच्या सरपंचान तवडकार हाका एक पत्र धाडून गांवांतल्या दोन अनाथ भांवड्याक ह्या उपक्रमा खाला घर बांदून दिवपाची विनवणी केल्या. सांगली- मिरज हांगा आपले जायते इश्ट आसा. तांच्या सहकार्यान आपूण त्या भावंडांक घर बांदून दितलों अशें तवडकारान सांगला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
