भांगरभूंय | प्रतिनिधी
मडगांव, खबरां मेज : कोंकणी भाशा मंडळ, गोंय हांणी कला आनी संस्कृती संचालनालय, रवींद्र भवन, मडगांव आनी एस. सी. ई. आर. टी, पर्वरे हांच्या जोड पालवान आयोजीत केल्ली पांचवी बाल साहित्य परिशद १५ आनी १६ फेब्रुवारी ह्या दिसांनी पाय तियात्रिस्त सभाघर, रवींद्र भवन, मडगांवां जातली. ही परिशद सकाळीं ९.३० ते सांजेच्या ४.३० वरां मेरेन चलतली.
उक्तावण बाल साहित्यकार पारो आनंद हांचे हस्तुकीं जातलें. ‘शूर जायात, काणयांतल्यान खरें सांगात’ ह्या विशयाचेर ती मार्गदर्शन करतली. ह्या वेळार कला आनी संस्कृती संचालक सगुण वेळीप तशेंच एस. सी. ई. आर. टीच्या शिक्षक प्रशिक्षणाचे संयोजक गोविंदराज देसाय मानाचे सोयरे म्हूण हजर रावतले.
पयले दिसा ‘नव्या युगांतल्या बाल साहित्याचे प्रकार आनी विशय’ ह्या विशयाचेर काणयेकार (स्टोरीटॅलर) तशेंच बुक्स दॅट स्पीकाची संस्थापक आसावरी दोशी आनी बाल साहित्यीक खयरुन्नीसा ए विचार मांडटलीं. दुसर्या सत्रांत बाल साहित्यकार पारो आनंद, आसावरी दोशी, खयरुन्नीसा ए आनी नेहा सिंगबाळ साहित्याचें सादरीकरण करतलीं. ते उपरांत ‘बाल मनांतलो कलाकार आनी रसीक’ ह्या विशयाचेर संगीतकार आनी गायक डॉ. सलील कुलकर्णी विचार मांडटले.
दुसरे दिसाच्या पयल्या सत्रांत ‘आदर्श बाल साहित्य, फुडाराची वाटचाल’ ह्या विशयाचेर बाल साहित्यीक वेनिता कुएल्यो आनी नेहा सिंग मार्गदर्शन करतल्यो. उपरांत जावपी ‘बाल साहित्याचीं साधनां: समन्वय आनी उपयुक्तताय’ ह्या विशयावेल्या सत्रांत काणयेकार (स्टोरीटॅलर) डॉ. प्राची कालरा तशेंच कहानी किड्स लायब्ररी, पुणेची संस्थापक गायत्री पटवर्धन मार्गदर्शन करतली.
ते उपरांत ‘गोंयांतल्या बाल साहित्याची प्रगती: एक संवाद’ ह्या विशयाचेर परिसंवाद जातलो. हातूंत सेंट्रल लायब्ररीचे क्युरेटर डॉ. सुशांत तांडेल, राजहंस संकल्पनेचे संस्थापक प्रभाकर भिडे, लेखक चेतन आचार्य, काणकोणाच्या निराकार हायस्कूलाची मुख्याध्यापक उर्वी फळदेसाय, लेखक आनी प्रकाशक दिनेश मणेरकार वांटो घेतले. लेखक आनी शिक्षक डॉ. तन्वी कामत बांबोळकार सत्राचें संयोजन करतली. ते उपरांत समारोप सुवाळो जातलो.
परिशद सगळ्यां खातीर उक्ती आसा आनी ते खातीर कसलेंच नोंदणी शुल्क भरपाची गरज ना.
हे परिशदेक हजर रावंक इत्सूक आशिल्ल्यांनी गुगल फाॅर्म भरून नांव नोंदणी करची असो उलो आयोजकांनी मारला. गुगल फॉर्माची लिंक: https://forms.gle/KuE6JUDJbPXJTno36 परिशदेच्या निमतान आयोजकांनी खाशेल्या बाल साहित्य पुस्तकांचे प्रदर्शन आनी विक्रीय आयोजीत केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
