फाल्यां खांडोळ्यां राज्य पांवड्या वयलो परिसंवाद

भांगरभूंय | प्रतिनिधी

पणजी, खबरां मेज ः खांडोळेंच्या सरकारी कला, विज्ञान आनी वाणिज्य महाविद्यालयाच्या कोंकणी विभागा वतीन पुराभिलेख संचालनालयाच्या जोडपावलान पांच सत्रांनी ‘पुर्विल्लें कोंकणी साहित्य आनी संशोधनाच्यो नव्यो दिशा’ हो राज्य पांवड्या वयलो परिसंवाद घडोवन हाडटात. ही कार्यावळ फाल्यां 14 फेब्रुवारीक सकाळीं 9 ते सांजेच्या ५ वरांचेर सरकारी म्हाविद्यालय, माशेल खांडोळें हांगा जातली.

सकाळीं 10 ते 11.30 वरां मेरेन उक्तावण सुवाळो जातलो. ह्या सुवाळ्यांत समाज कल्याण मंत्री सुभाष फळदेसाय मुखेल सोयरे म्हूण हाजीर आसतलें. मानाचे सोयरे म्हूण रोहीत कदम, तेच बरोबर प्रो. डॉ. भूषण भावे, प्रो. डॉ. पुर्णकला सामंत आनी कोंकणी विभाग मुखेली प्रो. डॉ. प्रकाश वजरीकार हाजीर आसतलें.

दुसरें सत्र ‘पुर्विल्लें कोंकणी भाशीक दायज’11.30 ते 1.00 मजगतीं जातलें. ह्या सत्रांत कोंकणी भाशेचो उगम आनी उदरगत, पुर्तुगेजां आदलें कोंकणी साहित्य आनी गोंया भायलो कोंकणी समाज आनी कोंकणी भास हाचेर भासाभास जातलीं. हांचे उपरांत 2.00 ते 3.30 वरांचेर ‘पुर्विल्लें कोंकणी साहित्य संशोधनाच्यो नव्यो दिशा’ हें तिसरें सत्र जातलें. हांतूत भायल्या मिशनरींचो कोंकणी भाशीक वावर, धर्मांतरीत (क्रिस्तांव) कोंकणी समाजाची भाशीक आभिव्यक्ती, संस्कृती प्रभाव आनी पुर्विल्लें कोंकणी साहित्य आनी संशोधनाच्यो नव्यो दिशा (पुराणां, ताम्रपटे आनी हेर) ह्या विशयांचेर भासाभास जातलीं.

चवथें सत्र ‘कोंकणी संशोधनाचीं साधनां आनी प्रक्रिया’ ह्या विशयाचेर 3.30 ते 4.30 मेरेन जातलें. हांतूत ग्रंथालय सूची आनी हेर साधनां, संशोधनाची लेखन प्रक्रिया आनी संगणकीय साधनां आनी कोंकणी संशोधन ह्या विशयाचेर भासाभास जातलीं. हांचे उपरांत 4.30 ते 5.00 वरांचेर पांचवे सत्र. तातूंत अभिप्राय आनी समारोप सुवाळो जातलो.
सगल्यांनी हे कार्यावळीक हजर रावचें, अशें आयोजकांनी कळीत केलां.