भांगरभूंय | प्रतिनिधी
पणजी, प्रतिनिधी : दक्षीण गोंयच्या प्रदेश भाजपान लोकसभा वेंचणुके खातीर पांच नांवां निश्चीत केल्यां. हातूंत ज्येश्ठ आमदार दिगंबर कामत हांचेंय नांव आसा. मात तांणी ही वेंचणूक लढपाची इत्सा ना अशें स्पश्ट केलें.
काल पणजे भाजपाच्या मुख्यालयांत लोकसभा वेंचणुकेचे उमेदवार निश्चीत करपा खातीर बसका घेतिल्ली. ह्या वेळार भाजपाचे वेंचणूक प्रभारी आशिष सूद हाजीर आशिल्ले. हे बसकेंत लोकसभेच्या दक्षीण गोवा मतदारसंघा खातीर पांच नांवां निश्चीत केल्यांत. हातूंत आदले खासदार नरेंद्र सावयकार, आदले उपमुख्यमंत्री बाबू कवळेंकार, सभापती रमेश तवडकार, आमदार दिगंबर कामत आनी आदले आमदार दामू नायक ह्या पांच जाणांचो आसपाव आसा. हीं पांचूय नांवां केंद्रीय नेतृत्वा कडेन धाडटले. हातूंतल्या एका नांवाचेर शिक्को मारतले. मात, दक्षीण गोंयच्या भाजप उमेदवारी खातीर जी पांच नांवां चर्चेंत आसात, तांतले बाबू कवळेकर आनी रमेश तवडकार ह्या दोगांय मदीं सर्त आशिल्ल्याचें भाजपांतल्या सुत्रांनी सांगिल्लें.
जाल्यार, दिगंबर कामत हांणी पयलींच आपल्याक दिल्ली वचपाची इत्सा नाशिल्ल्याचें पक्षाक कळयल्लें. कालचे बसकेंत तांचेंय नांव निश्चीत जाल्या उपरांत तांणी आयज परत ही वेंचणूक लढपाक आपल्याक इत्सा नाशिल्ल्याचें स्पश्ट केलें.
मजगतीं, दक्षीण गोंयांत ‘दर्जेदार उमेदवार’ दिवन जैत ओडून हाडपाची तयारी पक्षान केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
