… हांवें तिचो खून केला !! मोर्लें- सत्तरींतल्या त्या दुबावितान सांगलें, आनी…

भांगरभूंय | प्रतिनिधी

वाळपय, प्रतिनिधी ः मोर्ले- सत्तरींत 5 वर्सा पिरायेचे चलयेचे तकलेर फातर मारुन खून करपाचो यत्न केल्ल्याची घडणूक आयज सकाळीं उक्ताडार जाली. चलयेच्या घरा लागसार रावपी एका तरणाट्यान काल सांजवेळार चलयेचे आवय-बापूय घरांत नासतना तिचे तकलेर फातर मारलो. ते उपरांत ते चलयेक गायब केली. आयज सकाळीं लागसारच्या दोंगदार एका झाडा सकयल ते चली जखमी अवस्थेत पुलिसांक सांपडले. ह्या प्रकरणांत पुलिसांनी दुबावीत रामसेवक उर्फ गोलू ठाकूर (२३, मध्यप्रदेश) हाका अटक केली.

मोर्ले चिरेखणीचेर काम करपी मानाय रावतात, ते वस्तींतले एक ५ वर्सां पिरायेचे चली काल रातीं सावन बेपत्ता आशिल्लें. तिचे आवय-बापूय सांजवेळार कामा सावन घरा आयले उपरांत तांकां ते खंयच दिसून ना. देखून तांणी ताका सगळे कडेन सोदले. पूण ते मेळूंक ना. निमाणे आवय- बापायन वाळपय पुलिशेंत कागाळ दाखल केली. कागाळीचेर आदारून पुलिसांनी ते वस्तींतल्या लोकांची चवकशी केली. आनी चलयेच्या घरा कुशीक रावपी पांच जाणांक पुलिसांनी ताब्यांत घेतले. तातूंतल्या एका मनशान तिका आपूण जिवीं मारल्या अशें पुलिसांक सांगले. उपरांत हेर चार जाणांक पुलिसांनी सोडलें. गोलू ठाकुर अशें दुबाविताचें नांव.
काल ​​रातीं सांजवेळा 8 ते 3 मेरेन पुलिसांनी चलयेचो सोद घेतलो. पूण, ते खंयच मेळूंक ना. तपासांत दुबावीत पुलिसांक चुकीची म्हायती दितालो आनी सहकार्य करिनाशिल्लो. उपरांत फातोंडेर 3 वरांचेर पुलिसांनी सोद घेवप बंद करून दुबाविताचो पुराय तपास केलो ताच्या कडल्यान म्हायती काडून घेतली. उपरांत ताणें तिचे तकलेर फातर मारुन तिका जिवीं मारली अशें सांगलें. पुलिसांनी ताका परतून घडणूक सुवातेर व्हेलो आनी सोद घेवपाक सुरु केलो. सोद चालू आसतनाच दोंगरार एका झाडा सकयल हे चली जखमी अवस्थेत सांपडले. ताचे तकलेर जखम जाल्ली. उपरांत रोखडेच ताका उपचारा खातीर साखळें भलायकी केंद्रांत दाखल केले. दोतोरांनी प्राथमीक उपचारा उपरांत ताका जीएमसींत धाडलें.
मजगतीं, दुबावीत गोलू हांणे आपूण तिका मारली अशी म्हायती पुलिसांक पयलींच दिल्या. तर ताणें हें नेमकें कित्याक केलें? ताचे फाटले कारण कितें? ताचो सोद पुलीस घेतात. पुलीस निरिक्षक राहुल नायक हांच्या मार्गदर्शना खाला फुडली चवकशी सुरू आसा.