भांगरभूंय | प्रतिनिधी
स्पोर्टिंग क्लुब दी गोवाक आय लीग दुसरे विभागीय लीग सर्तींतले सामके उमळशीक वाडोवपी लडतींत धेंपो स्पोर्ट्स क्लबा कडल्यान 1-2 अशी निसट्टी हार घेवची पडली. एला पोरणें गोंय हांगाच्या धेंपो अकादमी मैदानाचेर ही मॅच जाली.
हे हारीक लागून स्पोर्टिंग क्लुब दी गोवा गुणतकट्यांतले दुसरे सुवातेर घसरलो. एफसी बंगळुरून युनायटेड स्पोर्ट्स क्लबाक 3-0 अशा फरकान हारोवन स मॅचीतल्यान 13 गूण मेळयले. जाल्यार स्पोर्टिंग 10 गुणांचेर कायम आसा. धेंपोचे पांच मॅचीतल्यान 7 गूण जाल्यात. तो गुणतकट्यांत पांचवे सुवातेर आसा.
धेंपोन घरच्या मैदानाचेर खेळपाचो लाव घेतना सुरवाती सावन बॉलाचेर चड वगत आपलो ताबो दवरलो. स्पोर्टिंग क्लुब दी गोवाक जुळून घेवपाक मात्सो वेळ लागलो. स्थिरावल्या उपरांत लेगीत तांकां चड वेळ बॉलाचेर ताबो दवरपाक अचडण आयली. 20व्या मिनटाक धेंपोन आघाडी घेवपी गोल केलो. विनय हरजीच्या हाफ व्हॉलीन स्पोर्टिंगाचो गोलकीपर डायलन दा सिल्वाक कसलीच संद दिवंक ना. स्पोर्टिंगान ह्या धपक्यातल्यान स्वताक सांबाळटना परतून एकसंघ खेळ करपाचो यत्न केलो.
दुसऱ्या अर्दांत स्पोर्टिंगान आपल्या खेळांत सुदारणां करीत शेल्टन निक्सनान धेंपोचो गोलकीपर संग्रामजीत चौधरीची परिक्षा घेतली. चौधरीक बॉल बरे तरेन धरपाक जमलो ना. ते उपरांत रिबावण्डाचेर गोल करपाची संद आसतना अॅलिस्टर अॅंथनीन बॉल थेट गोलकीपराच्या हातांत मारलो. 52व्या मिनटाक धेंपोन आपली आघाडी वाडयली. लक्ष्मणराव राणे कडल्यान मेळिल्ल्या पासाचेर पृथ्वेश पेडणेंकारान हेडर वरवीं हो गोल केलो. अखेरच्या पंदरा मिनटांनी स्पोर्टिंगान गती वाडयली. ताका लागून धेंपोची आघाडी उणी करपाक ताका येस आयलें. बिस्वादार्जीचे फ्री किकीचेर 89व्या मिनटाक संग्रामजीताक चकयलो. स्पोर्टिंगची फुडली मॅच 24 मार्चाक बंगळरू युनायटेडा आड बंगळुरूंत जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
