लोकेश राहुलाक तिसरी टॅस्ट चुकतली

भांगरभूंय | प्रतिनिधी

भारताच्या क्रिकेट पंगडाचो मदले फळयेंतलो बॅट्समन लोकेश राहुलाक राजकोटांत इंग्लंडा आड जावपी तिसरी टॅस्ट चुकतली. ताचे सुवातेर देवदत्त पडिक्कलाचो पंगडांत आस्पाव केला. भारतीय क्रिकेट नियामक मंडळान (बीसीसीआय) काल अधिकृत घोशणा केली.

राहुल सध्या राष्ट्रीय क्रिकेट अकादमींत रिहॅब करता. पयले टॅस्टी उपरांत लोकेशाचे जांगेक दुखापत जाल्ली. दुखापतीक लागून दुसरे टॅस्टींत तो खेळूंक नाशिल्लो.

भारत आनी इंग्लंड ह्या पंगडां मदली तिसरी टॅस्ट राजकोटांत 15 फेब्रुवारी सावन सुरू जातली.

कर्नाटकाच्या देवदत्त पडिक्कला कडेन टॅस्टींत पदार्पण करपाची संद आसा. पड्डिकल भारता वतीन टी-20 मॅची खेळ्ळा. पडिक्कल कर्नाटकाचो सध्याचो म्हत्वाचो बॅट्समन आसा. पयले श्रेणीचे क्रिकेटींत 31 मॅची खेळटना ताणें 2227 धांवड्यो केल्यात. हातूंत 12 अर्द शेंकड्यांचो आनी स शेंकड्यांचो आस्पाव आसा. अंदूंच्या रणजी हंगामांत ताणें 92.66चे सरासरीन 556 धांवड्यो केल्यात.

मजगतीं, राहुला वांगडा रवींद्र जडेजा लेगीत राष्ट्रीय क्रिकेट अकादमींत आसात. दोगांयचेर दोतोरांची बारीक नदर आसा. दोगांयचो तंदुरुस्त अहवाल अजून येवंक ना. जडेजा लेगीत जखमी आसा. पयले टॅस्टी वेळार ताका दुखापत जाल्ली.

राहुल आनी जडेजा भशेन श्रेयस अय्यर लेगीत जखमी आसा. दुसरे टॅस्टी वेळार फाटीचे दुखापतीक लागून ताका त्रास दिवपाक लागिल्लो.

पांच टॅस्टींचे माळेंत दोनूय पंगड सध्या 1-1 अशे बरोबरीत आसात. हैदराबादांत जाल्ली पयली टॅस्ट इंग्लंडान 28 धांवड्यांनी जिखिल्ली, जाल्यार विशाखापट्टणमांत जाल्ली दुसरी मॅच भारतान 106 धांवड्यांनी जिखून बरोबरी सादिल्ली. तिसरी मॅच 15 फेब्रुवारीक राजकोटांत जातली. चवथी मॅच 23 फेब्रुवारी सावन रांचींत सुरू जातली, जाल्यार पांचवी आनी निमाणी मॅच 7 मार्च सावन धर्मशालांत सुरू जातली.

तिसरे टॅस्टी खातीर भारताचो पंगडः रोहीत शर्मा (मुखेली), यशस्वी जयस्वाल, शुभमन गील, देवदत्त पडिक्कल, रजत पाटीदार, सरफराज खान, केएस भरत (विकेटकीपर), ध्रुव जुरेल (विकेटकीपर), रवींद्र जडेजा*, रविचंद्रन अश्विन, अक्षर पटेल, कुलदीप यादव, वॉशिंग्टन सुंदर, जसप्रीत बुमराह, मोहम्मद सिराज, मुकेश कुमार आनी आकाश दीप.

* जडेजा तंदुरुस्त जाल्या उपरांतूच मॅच खेळपाक शकतलो.