भांगरभूंय | प्रतिनिधी
धामसे – सत्तरी परंपरीक रस्तो आडायिल्लें प्रकरण
फोंडें: धामसे-सत्तरींतलो परंपरीक रस्तो आडायिल्ल्या प्रकरणांत सत्तरी म्हालाचे जोड मामलेदार विष्णू राणे हांणी गुळेली पंचायतीच्या तलाठ्याक नोटीस बजायल्या. 21 वेर सकाळीं 11 वरांचेर ह्या प्रकरणाची सुनावणी सत्तरी म्हाल मामलेदार कचेरेंत जातली. ह्या प्रकरणांत सर्वे क्रमांक 10/1 तल्यान वचपी कथीत रस्तो आडायिल्ल्या प्रकरणांत सदर तलाठ्याक निलंबीत करचे म्हणून धामसे-सत्तरींतले नागरीक नारायण नायक हांणी भलायकी मंत्री विश्वजीत राणे हांचे कडेन कागाळ केल्ली. तशेंच मामलेदार न्यायालय कलम चार खाला सत्तरी मामलेदार कचेरेंत याचिका दाखल केल्ली.
सोमारा ही खबर उजवाडा आयले उपरांत सत्तरी म्हाल मामलेदार तशेंच भलायकी मंत्री विश्वजीत राणे हांणी ह्या प्रकरणाची गंभीर दखल घेतिल्ल्यान सद्या नारायण नायक आनी तांच्या कुटुंबाक न्याय मेळपाची शक्यताय वाडल्या.
हाचे पयलीं वाळपय पुलीस स्टेशनार लेगीत कागाळ दाखल केल्ली. भलायकी मंत्री विश्वजीत राणे हे विशीं कसलो निर्णय घेतात हाचे कडेन सगल्यांचें लक्ष लागून आसा. रस्तो आडावपाचें प्रकरण गाजत आसा आनी ह्या प्रकरणांतल्यान खूबशो गजाली आतां मुखार येवपाची शक्यताय आसा.
गोंयांत परंपरीक रस्ते आनी पांयवाटो आडावपाचे प्रकार सेगीत घडत आसतात आनी सरकारा कडेन कसलेंच धोरण नाशिल्ल्याचें दिसून आयलां. श्रीराम मंदीर बुन्यादीच्या कार्यावळीच्या दिसा सावन धामसे-सत्तरींतले नारायण नायक हांच्या कुटुंबांन आडायिल्लो रस्तो मेकळो जावचो म्हणून खूबशा जाणां कडेन विनवणी केल्ली. वाळपय पुलीस स्टेशन, म्हाल मामलेदार, मुख्यमंत्री, भलायकी मंत्री अशा खूबशा जाणां कडेन कागाळी दिल्ल्यो. सदर तलाठ्या आड कारवाय जाली ना जाल्यार कुटुंबा सयत पंचायती मुखार आमरण उपोशण सुरू करपाची शिटकावणी नारायण नायक हांणी दिल्ली.
रस्तो आडायिल्ल्यान नायक कुटूंब पुरायपणान आडकून पडलां. तेच बरोबर गोठ्यांतल्या चार गोरवांक लागपी चारो हाडूंक मेळना. ताका लागून जनावरांक लेगीत घात निर्माण जाला. तशें पळोवंक गेल्यार हीं जनावरां लेगीत आतां संकश्टांत सांपडल्यात. सोमारा खबर उजवाडा आयले उपरांत जोड मामलेदार हांणी दखल घेतिल्ल्यान नायक कुटुंबाक धादोसकाय मेळ्ळ्या. मुख्यमंत्री डॉ. प्रमोद सावंत हांणी लेगीत दखल घेवपाची मागणी नायक कुटूंब करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
