भांगरभूंय | प्रतिनिधी
देशी-विदेशी पर्यटकांची करतात सतावणूक
हरमल: हांगासरल्या दर्यादेग वाठारांनी सद्या पुलिसांची नदर चुकोवन भिकारी लोकांनी अच्छेव मांडला. मुखेल रस्तो, भितरले रस्ते, एटीएम, रेस्टॉरंण्ट बी वाठारांनी तांचो वावर सुरू आसा. तांचे हे कृतीचो पर्यटकांनी तिडक उक्तायल्या.
मजगतीं, भीक मागप कायद्यान गुन्यांव आसा आनी पुलीस अधिकारी हेतुपुरस्सर आडनदर करतात काय कितें असो प्रस्न आसून, दर्यादेगांचेर तांचे कडल्यान पर्स आनी बॅगां झोमून व्हरपाच्यो लेगीत घडत आसतात. तांचेर खर कारवाय करपाची मागणी आदले पंच वांगडी प्रवीण वायंगणकार हांणी केल्या.
फाटले आठ दीस तांचो वावर आनी राबितो बरोच वाडला. खूबशे नवे भिकारी हात, पांय नाशिल्ल्याचें धोंग करून पयशा खातीर मागणी करतात. त्या पयशांतल्यान सोरो पियेवन जमनीर न्हिदिल्ले दिसून येतात. ताका लागून कांय पर्यटक तांकां पयशे दिनासतना खावपाक बी दितात, पूण हे भिकारी खावपाक नाका अशें सांगून थंयच्यान पळ काडटात अशें एका वेवसायिकान सांगलें.
मजगतीं, ह्या भिकाऱ्यांक लागून पर्यटन थळ बदनाम जायत आशिल्ल्याचें दिसून येतात. देशी-विदेशी पर्यटक मोटारींतल्यान देंवतकच हे भिकारी तांचे मेरेन धांव घेतात आनी पयशांची मागणी करतात. तांकां मोटारींतल्यान देंवपाक लेगीत दिनात. हे खातीर पर्यटकांची बरीच कोंयडी जाता. दर्यादेगां वयली सोबीतकाय पळोवंक आयिल्ल्या पर्यटकांक मात ह्या भिकाऱ्यांक लागून मनस्ताप सोंसचो पडटा.
हे भिकारी फक्त पर्यटन हंगामात येतात
हे जिवान धडधाकट आशिल्ले भिकारी काम बी कांयच करिनासतना फक्त भीक मागून आपलो दीस धुकलतात. फक्त पर्यटन हंगामात जाग्याजाग्यांनी हे लोक भीक मागीत आसतात. एका पर्यटकान पयशे दिल्यार रोखडेंच ताच्या दुसऱ्या वांगड्या कडेन पयशे मागतात. ताचो परिणाम वेवसायाचेर जायत आशिल्ल्याचें एका रॅस्टोरंण्ट वेवसायिकान सांगलें.
मांद्रें पुलीस स्टेशनाच्या अधिकाऱ्यांनी अभियान राबोवन दर्यादेगां वयल्या भिकाऱ्यांक धांवडान घालचे आनी दर्यादेगो भिकारी मुक्त करच्यो. तशेंच पर्यटकांक सोयिस्कर वातावरणाचो लाव घेवपाक दिवचो अशी मागणी सगल्या थरांतल्यान जायत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
