भांगरभूंय | प्रतिनिधी
भांगरभूंय । प्रतिनिधी
पणजीः राज्यांत 2022 आनी 2023 वर्सा येरादारी नेमांचें उल्लंघन केल्ले खातीर येरादारी खात्यान 8,525 जांणाची लायसनां निलंबीत केली. तातूंत सगल्यात चड 4,405 फास्ट वाहनां चलयतल्यांचो आसपाव आसा. सोरो पियेवन वाहन चलयल्ले खातीर 591 जाणांची लायसनां निलंबीत केल्यांत.
2022 वर्सा 4,415 जाणांची जाल्यार 2023 वर्सा 4,110 जाणाची लायसना निलंबीत केल्यात, येरादारी खात्याच्या मडगांव कार्यालयान सगल्यांत चड 3,002 जाणांची लायसना निलंबीत केल्यांत. सर्वोच्च न्यायालयान तयार केल्ल्या रस्तो सुरक्षा समितीन तयार केल्ल्या मार्गदर्शक तत्वां प्रमाण येरादारी खात्यान येरादारी नेम मोडटात ताचें लायसन तीन म्हयन्या खातीर निलंबीत करपाची ही कारवाय केल्या.
वाहना फास्ट चयल्ल्यान 4,405 जाणाचीं, जंक्शना कडेन आशिल्ल्या येरादारी सिंग्नलांक पाळो दिले नाशिल्ल्या 1,695 जाण, माल येरादारी वाहनांतल्यान प्रवाशी व्हरपी 171 ड्रायव्हराची, तांकी परस चड माल येरादारी करपी 5 जाण, सोरो पियेवन वाहनां चलोवपी 591 जाणी आनी वाहन चलयतना मोबायलचो वापर केल्ले खातीर 1,408 जांणाची लायनसा फाटल्या दोन वर्सांत निलंबीत केल्यात. येरादारी खात्याच्या मडगांव (3,002), पणजी (1,341), फोंडें (1,255), म्हापशें (1,169), वास्को (590), केंपें (452), पेडणे (381), दिवचल (253), काणकोण (62), आनी धारबांदोडें (20) कार्यालयांनी लायसना निलंबनाची ही कारवाय केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
