भांगरभूंय | प्रतिनिधी
पणजी: गोवा वेल्हा राष्ट्रीय म्हामार्गार सोमारा दनपारां मोटार आनी ट्रक हांचे मदीं भिरांकूळ अपघात जालो. ह्या भिरांकूळ अपघातांत मोटार चालक झहीर अब्बास शेख (तालकोंडें, मडगांव) हो गंभीर जखमी जालो. ह्या प्रकरणांत आगशी पुलिसांनी वाहन अपघाताची नोंद केल्या.
आगशी पुलिसांनी दिल्ले म्हायती प्रमाण सोमारा दनपारां 1.30 वरांच्या सुमाराक गोवा वेल्हा राष्ट्रीय म्हामार्गार मोटार आनी ट्रक हांचे मदीं अपघात जाल्ल्याची म्हायती पुलीस नियंत्रण कक्षाक दिल्ली. ही म्हायती कक्षान आगशी पुलीस स्टेशनार दिली. हाची दखल घेवन पुलीस निरिक्षक विक्रम नायक हांच्या मार्गदर्शना खाला हवालदार सुनील मुरगांवकार आनी हेर पुलिसांनी घडणूक थळार धांव घेतली.
अपघाताची म्हायती मेळटकूच 108 एम्बुलन्स घडणूक थळार दाखल जाली. ह्या वेळार जखमी जाल्लो मोटार चालक झहीर अब्बास शेख हाका बांबोळे गोंय वैजकी म्हाविद्यालयाच्या हॉस्पिटलांत उपचारा खातीर दाखल केलो. थंय ताचेर उपचार सुरू आसात.
मजगतीं, आगशी पुलीस हवालदार सुनील मुरगांवकार हांणी घडणूक थळार धांव घेवन अपघाताचो पंचनामो केलो. आनी पंचनामो करून दोनूय वाहनां कुशीक काडलीं.
पुलिसांनी दिल्ले म्हायती म्हायती प्रमाण मोटार चालक झहीर अब्बास शेख मोटार घेवन पणजे सावन मडगांवां वतालो. गोवा वेल्हा पावतकच ताचो मोटारी वेलो ताबो सुटिल्ल्यान ताणें मुखार वचत आशिल्ल्या ट्रकाक फाटल्यान नेटाचो धपको दिलो. हातूंत मोटारीचो चुरो जालो. ह्या वेळार चालक झहीर अब्बास शेख मोटारींत आडकून उरलो. ताका थळावे तशेंच पुलीस आनी हेरांनी भायर काडून उपरांत हॉस्पिटलांत दाखल केलो. ह्या प्रकरणांत हवालदार मुरगांवकार हांणी वाहन अपघाताची नोंद करून फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
