भांगरभूंय | प्रतिनिधी
फोंडें: धारबांदोड्यां उपजिल्होधिकारी कचेरे मुखार आशिल्ल्या स्पीड ब्रेकाराचो अदमास येवंक नाशिल्ल्यान स्कुटर पडून जाल्ल्या अपघातांत निफा फर्नांडीस (26, रिवण) हें फाटल्यान बशिल्ले तरणाटेक हॉस्पिटलांत व्हरतना मरण आयलें. जाल्यार स्कुटर चालक जॉली फर्नांडीस (26, सांगें) हें किरकोळ जखमी जालें. हो अपघात सोमारा रातच्या 8 वरांच्या सुमाराक घडलो. स्पीड ब्रेकराचेर सेगीत अपघात जायत आशिल्ल्यान मंगळारा सकाळीं थळाव्या लोकांनी रास्तो करपाची शिटकावणी दिल्या.
मेळिल्ले म्हायती प्रमाण जीए 09 एस 1516 क्रमांकाची स्कुटर तिस्क उसगांव सावन सांग्यार वताली. धारबांदोड्यां उपजिल्होधिकारी कचेरे मुखार आशिल्ल्या स्पीड ब्रेकराचो अदमास येवंक नाशिल्ल्यान स्कुटर रस्त्यार पडली. हातूंत स्कुटरी फाटल्यान बशिल्ली निफा फर्नांडीस ही तरणाटी गंभीर जखमी जाली. जाल्यार स्कुटर चालक किरकोळ जखमी जाली. जखमीक रोखडेंच 108 एम्बुलन्सींतल्यान पिळयां मुळाव्या भलायकी केंद्रांत दाखल केली. पूण भलायकी केंद्रांत पावचे पयलीं तरणाटेक मरण आयलें. फोंडें पुलिसांनी अपघाताचो पंचनामो केलो.
धारबांदोड्यां उपजिल्होधिकारी कचेरे मुखार आशिल्ल्या स्पीड ब्रेकाराचेर सेगीत अपघात घडत आशिल्ल्यान थळावे लोक स्पीड ब्रेकर काडपाची मागणी करताले. पूण स्पीड ब्रेकर काडूंक नाशिल्ल्यान सोमारा रातीं जाल्ल्या अपघातांत एके तरणाटेक आपलो जीव व्हगडावचो पडलो. फुडारांत परतून अपघात घडचे न्हय हे खातीर मंगळारा सकाळीं थळाव्या लोकांनी रास्ता राको करपाचो निर्णय घेतला. रास्ता रोको केल्यार फोंडें-बेळगांव मार्गा वेली येरादारी ठप्प जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
