भांगरभूंय | प्रतिनिधी
भांगरभूंय । प्रतिनिधी
पोरणे गोंयः सान्तआंद्रेचो आमदार विरेश बोरकार हाच्या यत्नांत लागून सुमार 40 वर्सां उपरांत शिरिदांव आनी पिलार हांगच्या जमनी वयल्या उदका टांकयाच्या नूतनीकरणाचें काम जालें. सोमारा आमदार बोरकाराचे हस्तुकीं तांचें उक्तावण केलें.
शिरिदांवच्या टाकयेच्या नूतनीकरणा खातीर 27 लाख आनी पिलारचे टाकये खातीर 12 लाख रुपया खर्च आयलो. फाटल्या 40 वर्सा सावन ह्या टाकयां कडेन आडनदर जाल्ल्यान तांका गळटी लागल्ली आनी नूतनीकरणाची सामकी गरज आशिल्ली, अशें उक्तावण केल्या उपरांत बोरकारान पत्रकारांक सांगलें.
आमदार म्हणून सान्तआंद्रेच्या लोकांनी म्हाका वेंचून दिल्या उपरांत गळटी लागल्ल्या ह्या टाकयां कडेन म्हजें लक्ष गेलें. गळटी थांबोवन उदका उणाव पयस करपा खातीर तांचे नूतनीकरण करपाच्या कामांत हांवें लक्ष घातले. बांधकाम खात्याच्या अधिकाऱ्यां कडेन म्हज्या ऑफिसांतल्या कर्मचाऱ्यांनी फाटपुरवण करून काम तडीक व्हेलें अशें ताणे सांगलें.
टांकयांच्या उक्तावणा वेळार शिरिदांव सरपंच सुवर्णा कुंकळ्ळकार, गोवा वेल्हाचो उपसरपंच मोनिका मिरांडा, आगशीचो पंच वांगडी लक्षदीप गांवस आनी ज्युलियस आल्मेजा आनी बांधकाम खात्याचे अधिकारी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
