भांगरभूंय | प्रतिनिधी
भांगरभूंय । प्रतिनिधी
वास्कोः मुरगांव तालुक्यांतल्या लोकांचे गर्दींत सोमारा सांजे वास्को शारांत कार्नवाल चित्ररथ मिरवणूक जाली. स्वातंत्र्यपथ लोकांच गर्दीन सामको फुलून गेल्लो. समाज कल्याण मंत्री सुभाष फळेदसाय हाणे कार्नवाल मिरवणुकेक सुरवात करून दिली. ह्या वेळार वास्कोचो आमदार कृष्णा (दाजी) साळकार, मुरगांवचो आमदार संकल्प आमोणकार, मुरगांवचो नगराध्यक्ष गिरीश बोरकार, वास्को कार्नवाल समितीचो अध्यक्ष फ्रान्सिस्को डिसोझा आनी हेर मानेस्त हाजीर आशिल्ले.
कार्नवाल व्हो जरी मजा आनी मस्तीची परब आसली तरी तिका लागून लोकां मदीं एकचाराची भावना तयार जाता. किंग मोमोच्या राजवटींत लोक दुख, वेदना विसरून एकमेकां लागीं येतात अशें फळदेसायान ह्या वेळार सांगलें. कार्नवाल व्हो जातीय एकचाराचें प्रतीक आसा अशें कृष्णा साळकारान सांगलें. संवसारांत जायते कडेन कार्नवाल जाता मात भारतांत फकत गोंयांत ही परब मनयतात अशें संकल्प आमोणकारान सांगलें.
कार्नवाल मिरवणुकेक लागून स्वातंत्र्यपथ बरे तरेन सजयल्लो. बँड वादना सयत चित्ररथ मिरवणूक जाली. मिरवणुकेंत पयले सुवातेर आशिल्ल्या चित्ररथांत किंग मोमो आनी राणी आशिल्ली. लोकांनी तांकां उर्बे भरीत येवकार दिलो. वास्को रेल्वे स्टेशना कडेन मानेस्तांक चित्ररथ मिरवणूक पळोवपाक मेळची म्हणून व्हडली स्टेज घातिल्ली. सामाजीक आनी सांस्कृतीक संदेश दिवपी तशेंच गोंयच्या सांस्कृतीक दायज दाखोवपी चित्ररथ मिरवणुकेंत आशिल्ले. कुणबी डान्स, डान्स अकादमी, कृशी खातें, पुलीस आनी नौदलाचो चित्ररथ मिरवणुकेंत वांटेकार जाल्लो.
पालिका इमारती सामकार मिरवणुके उपरांत फ्रन्टलायन ह्या म्युझिकल बँडान मनरिजवणी कार्यावळ सादर केली.चित्ररथ मिरवणुकेंत सुमार 61 चित्ररथ आशिल्ले. तातूंत क्लब आनी संस्थाचे 16 चित्ररथ, 9 पारंपरीक, क्लॉवन आनी जोकर्साचे 15, फन आनी जंक कारचे 9, फॅमिलीचे 10, स्पोन्सराचें 2 चित्ररथ आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
