भांगरभूंय | प्रतिनिधी
नवी दिल्ली, खबरां संस्था ः आरे कसले व्हिडियो तयार करतात, तातूंतल्यान तुमकां कितें मेळटलें? अशें प्रस्न पयलीं निर्माण जाताले. पूण आतां समाजात ऑनलायन क्रिएटर्सांक सेलिब्रिटींची वळख मेळ्ळ्या. सोशल मिडिया इन्फ्लुएन्सर्साची समाजांत बदल घडोवन हाडपाची शक्त अफाट आसा. ह्याच लोकांक प्रोत्साहन दिवपा खातीर आतां माय जीओव्ही इंडियान (MyGov India) भारताच्या डिजिटल क्रिएटर्सा खातीर (राष्ट्रीय क्रिएटर्स पुरस्कार) खाशेले पुरस्कार जाहीर केल्यात.
केंद्र सरकाराच्या अधिकृत संकेतथळार अधिसुचोवणेंत सांगिल्ले प्रमाण प्रधानमंत्री नरेंद्र मोदी हांणी डिजिटल क्रिएटर्सांच्या वावराक मान्यताय दिवन तांका नव्या विशयांचेर भाश्य करपाक प्रोत्साहन दिलां. ह्या पुरस्कारां वरवीं भारतीय संस्कृताय आनी परंपरा संवसारांत हाडपी मुखामळांचो भोवमान जातलो आनी हेर कलाकारांक समाजांत बदल घडोवन हाडपा खातीर वावुरपाक प्रोत्साहन दिवपाच्या हेतान हो पुरस्कार सुवाळो घडोवन हाडटले.
20 मळा वयल्या इन्फ्लुएन्सर्सांक वेगवेगळे पुरस्कार दिवन भोवमान करतले.
० उत्कृश्ट कथाकार पुरस्कार : काणयेंतल्यान भारतीय संस्कृतायेची म्हायती दिवपी क्रिएटर.
० द डिसप्टर ऑफ द इयर : एक असो क्रिएटर जांणी आपल्या कॉन्टेतांतल्यान आपल्या मळार म्हत्वाचो बदल घडोवन हाडला.
० सेलिब्रिटी क्रिएटर ऑफ द ईयर : एक असो क्रिएटर जांणी आपल्या व्हड प्रमाणांतल्या फॉलोअर्साक मार्गदर्शन करून तांच्या कॉन्टेन्ट वरवीं समाजांत सकारात्मकताय पातळावपाक मजत केल्या.
० ग्रीन चॅम्पियन पुरस्कार : पर्यावरणा खातीर वावुरपी क्रिएटराक हो पुरस्कार दितले.
० समाजीक बदल घडोवपी उत्कृश्ट क्रिएटर : समाजीक बदल घडोवन हाडपाक फुडाकार घेवपी क्रिएटराक हो पुरस्कार दिवन भोवमान करतलें.
० शेतकी मळार प्रभावी क्रिएटर : शेतकी मळार म्हत्वाची कामगिरी करून शेतकारांक उपेगाची म्हायती दिवपी क्रिएटराचो भोवमान करतले.
० कल्चरल अम्बॅसेडर ऑफ द इयर : भारतीय संस्कृतायेचे वेगवेगळे प्रकार उजवाडाक हाडून तांचो प्रसार करपाक आदार दिवपी लोकांक हो पुरस्कार दितले.
० आंतरराश्ट्रीय क्रिएटर पुरस्कार : परदेशांत रावून भारताची संस्कृताय संवसारांत पावोपाक वावुरपी क्रिएटर.
० पर्यटनांतलो उत्कृश्ट क्रिएटर पुरस्कार : भारतांतल्या पर्यटनाक चालना दिवपाक कॉन्टेन्ट तयार करपी क्रिएटराचो भोवमान जातलो.
० नितळसाण अम्बॅसेडर पुरस्कार : नितळसाणच्या मळार आदारीत कॉन्टेन्ट करप्यांचो भोवमान जातलो.
० द न्यू इंडिया चॅम्पियन पुरस्कार : भारताची उदरगत आनी सरकारी धोरणां विशीं जागृताय पातळावपी आनी राष्ट्र निर्मितीचेर लक्ष केंद्रीत केल्ल्या उपक्रमांक चालना दिवपी क्रिएटरसांचो भोवमान करतले.
० टेक क्रिएटर पुरस्कार : नव्या साधनां विशीं, तंत्रगिन्याना विशीं म्हायती दिवपी, प्रस्न सोडोवपी क्रिएटराचो भोवमान.
० हेरिटेज फॅशन आयकॉन पुरस्कार : थळाव्या कपड्याच्या ब्रँडांचो तशेंच कलेचो प्रचार करपी क्रिएटराचो भोवमान.
० मोस्ट क्रिएटिव्ह : मनरिजवण आनी समाजीक जागृताय ह्या दोनूय गजालींनी समृद्ध कॉन्टेन्ट तयार करपी क्रिएटराक हो पुरस्कार दितले.
० अन्न मळार उत्कृश्ट क्रिएटर : भारतीय जेवणाची म्हायती दिवपी क्रिएटराक हो पुरस्कार दितले.
० शिक्षण मळार उत्कृश्ट क्रिएटर : ऑनलायन शिक्षणीक कॉन्टेन्ट तयार करपी क्रिएटराचो भोवमान.
० गेमींग मळार उत्कृश्ट क्रिएटर : गेमप्ले, रिव्ह्यू वा कमेंट्री वरवीं खेळां विशीं म्हायती दिवपी क्रिएटराचो जातलो भोवमान.
० बेस्ट मायक्रो क्रिएटर : खाशेलो प्रेक्षक आसून लेगीत म्हत्वाच्या मळार म्हत्वाचो प्रभाव घालपी क्रिएटराक हो पुरस्कार दितले.
० बेस्ट नॅनो क्रिएटर : संवाद आनी वैयक्तीक संबंदांतल्यान प्रेक्षकांक मार्गदर्शन करपी क्रिएटर.
० बेस्ट भलायकी आनी फिटनेस क्रिएटर : भलायकी, निरोगीपण आनी फिटनेसाक चालना दिवपी क्रिएटराक हो पुरस्कार.
जैतिवंत कशे वेंचून काडटले?
निवड प्रक्रियेंत नामांकनाचो टप्पो, नामांकनांची स्क्रीनिंग (निवड), भौशीक मतदान आनी निवड समिती (ज्युरी) कडल्यान रिव्ह्यू घेवप हांचो आस्पाव जाता. ज्युरी आनी भौशीक मतांच्या एकत्रीत गूणांचेर आदारीत जैतिवंत जाहीर करतलें.
मजगतीं, भारतांतली डिजिटल उदरगत मनोवपा खातीर MyGov India वरवीं सगळ्या डिजिटल क्रिएटर्सांक आनी बदल घडोवप्यांक ह्या उपक्रमांत वांटो घेवपाचो उलो मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
